ബംഗളൂരു: പേ സിഎമ്മിന് പിന്നാലെ സേ സിഎമ്മുമായി രംഗത്തെത്തിയ കോൺഗ്രസിന് ചുട്ടമറുപടി നൽകി കർണാടക മുഖ്യമന്ത്രി ബസവരാജ് ബൊമ്മൈ. ജോലി ഇല്ലാത്തവരാണ് കോൺഗ്രസ് പാർട്ടിയെന്ന് അദ്ദേഹം കുറ്റപ്പെടുത്തി.സംസ്ഥാനത്തെ ബിജെപി സർക്കാർ പ്രവൃത്തിയിലൂടെയാണ് ജനങ്ങളോട് സംസാരിക്കുന്നതെന്നും ജനങ്ങളുടെ ക്ഷേമത്തിനായാണ് നിലകൊള്ളുന്നതെന്നും അദ്ദേഹം പറഞ്ഞു.
പ്രത്യേകിച്ച് ഒരു ജോലിയും ഇല്ലാത്ത കോൺഗ്രസുകാരാണ് ഇത്തരം പരിപാടികളുമായി ഇറങ്ങുന്നതെന്ന് അദ്ദേഹം പരിഹസിച്ചു.പക്ഷേ സർക്കാറിനെ മുന്നോട്ട് കൊണ്ട് പോകാനും ജനക്ഷേമ പ്രവർത്തനങ്ങൾ നടത്താനും ഞങ്ങൾക്ക് ഉത്തരവാദിത്തമുണ്ട്. ഞങ്ങളുടെ ജോലിയിലൂടെ ഞങ്ങൾ ആളുകളിലേക്ക് എത്തുന്നു. നമ്മൾ സംസാരിക്കുന്നതിനേക്കാൾ നമ്മളുടെ പ്രവൃത്തി സംസാരിക്കണമെന്നാണ് ബിജെപി വിശ്വസിക്കുന്നതെന്ന് ബസവരാജ് ബൊമ്മൈ കൂട്ടിച്ചേർത്തു.
ഇന്ന് ഉച്ചയോടെയാണ് സേ സിഎം എന്ന വെബ്സൈറ്റും ക്യൂആർ കോഡും കോൺഗ്രസ് പുറത്തിറക്കിയത്. പേ സിഎം” എന്ന പ്രചാരണത്തിന് ശേഷമാണ് പുതിയ വെബ്സൈറ്റ്. ക്യുആർ കോഡ് സ്കാൻ ചെയ്ത് ആളുകൾക്ക് വെബ്സൈറ്റിലേക്ക് പ്രവേശിക്കാവുന്ന തരത്തിലാണ് വെബ്സൈറ്റിന്റെ നിർമ്മാണം.
