കോയമ്പത്തൂർ: ജോലി ചെയ്യുന്നതിനിടെ അബദ്ധത്തിൽ നട്ട് വിഴുങ്ങി ഇലക്ട്രീഷ്യൻ. തമിഴ്നാട്ടിലെ കോയമ്പത്തൂരിലെ സർക്കാർ ആശുപത്രിയിലാണ് സംഭവം. കോയമ്പത്തൂർ സ്വദേശിയായ ഷംസുദ്ദീൻ ഇലക്ട്രീഷ്യനായി ജോലി ചെയ്യുന്ന വ്യക്തിയാണ്. ഒക്ടോബർ 18-ന് ജോലിക്കിടെ അബദ്ധത്തിൽ ഇയാൾ ഇരുമ്പ് നട്ട് വിഴുങ്ങുകയായിരുന്നു. അടിയന്തിര ശസ്ത്രക്രിയയിലൂടെയാണ് ഡോക്ടർമാർ ഇയാളുടെ ജീവൻ രക്ഷിച്ചത്.
നട്ട് ഉള്ളിൽ പോയതോടെ ഷംസുദ്ദീൻ ചുമയ്ക്കാൻ ആരംഭിച്ചു. പിന്നാലെ ശ്വാസം എടുക്കാൻ ബുദ്ധിമുട്ട് അനുഭവിച്ചു. ഇതോടെ ഒപ്പം ഉണ്ടായിരുന്നവർ ഇയാളെ ആശുപത്രിയിൽ എത്തിക്കുകയായിരുന്നു. തുടർന്ന് ഷംസുദ്ദീനെ ഓട്ടോറൈനോലാറിംഗോളജി വിഭാഗത്തിൽ പ്രവേശിപ്പിച്ചു. നെഞ്ചിന്റെ എക്സ്-റേ എടുത്തപ്പോൾ ഇയാൾ വിഴുങ്ങിയ നട്ട് ശ്വാസനാളത്തിൽ കുടുങ്ങി ഇടതു ശ്വാസകോശത്തിലേക്ക് പോകുന്നതായി ഡോക്ടർമാർ കണ്ടെത്തി.
തുടർന്ന്, ഓട്ടോറൈനോലാറിംഗോളജി വിഭാഗം മേധാവി ഡോക്ടർ ശരവണൻ, അനസ്തേഷ്യോളജി വിഭാഗത്തിലെ അലിസുൽത്താൻ, മണിമൊഴി, സെൽവൻ, മദനഗോപാലൻ എന്നിവരടങ്ങുന്ന ഡോക്ടർമാരുടെ സംഘം എൻഡോട്രാഷ്യൽ ഉപകരണം ഉപയോഗിച്ച് ശസ്ത്രിക്രിയ നടത്തി. ഇതിലൂടെ ഷംസുദിൻ വിഴുങ്ങിയ ഇരുമ്പ് നട്ട് വിജയകരമായി പുറത്തെടുക്കുകയായിരുന്നു.
