ന്യൂഡല്ഹി: രാജ്യത്തെ റെയില്വേ സുരക്ഷ കൂടുതല് ശക്തമാക്കുന്നതിന്റെ ഭാഗമായി കവച് 4.0 നടപ്പാക്കാന് വന്തുക അനുവദിച്ച് ഇന്ത്യന് റെയില്വേ. നോര്ത്ത് റെയില്വേയുടെ മുറാദാബാദ് ഡിവിഷനിലെ ശേഷിക്കുന്ന 712 റൂട്ട് കിലോമീറ്ററില് കവച് 4.0 സ്ഥാപിക്കുന്നതിനായി 170 കോടി രൂപയാണ് അനുവദിച്ചത്. തദ്ദേശീയമായി വികസിപ്പിച്ച ഓട്ടോമാറ്റിക് ട്രെയിന് പ്രൊട്ടക്ഷന് സംവിധാനമായ കവച് 4.0 നടപ്പാക്കുന്നതോടെ തിരഞ്ഞെടുത്ത റെയില്പാതകളിലെ ട്രെയിന് സര്വീസുകളുടെ സുരക്ഷ കൂടുതല് മെച്ചപ്പെടുമെന്ന് റെയില്വേ മന്ത്രാലയം അറിയിച്ചു.
ട്രെയിനുകളുടെ സുരക്ഷിതമായ പ്രവര്ത്തനം ഉറപ്പാക്കുന്നതിനുള്ള അധിക സുരക്ഷാ സംവിധാനമായാണ് കവച് 4.0 വിന്യസിക്കുന്നത്. റെയില്വേ ശൃംഖലയില് ആധുനിക സുരക്ഷാ സാങ്കേതികവിദ്യ വ്യാപിപ്പിക്കുന്നതിന്റെ ഭാഗമായാണ് നടപടി. ഈസ്റ്റ് സെന്ട്രല് റെയില്വേയുടെ സമസ്തിപൂര് ഡിവിഷനിലെ 21 സ്റ്റേഷനുകളില് ഇലക്ട്രോണിക് ഇന്റര്ലോക്കിംഗ് സംവിധാനം സ്ഥാപിക്കുന്നതിനായി 233 കോടി രൂപയ്ക്കും റെയില്വേ മന്ത്രാലയം അനുമതി നല്കി.
ആധുനിക സിഗ്നലിങ് സംവിധാനമായ ഇലക്ട്രോണിക് ഇന്റര്ലോക്കിംഗ് നിലവിലുള്ള പഴയ റിലേ അധിഷ്ഠിത സംവിധാനങ്ങള്ക്ക് പകരമായാണ് ഉപയോഗിക്കുന്നത്. ഇതിലൂടെ സിഗ്നലിങ് സംവിധാനത്തിന്റെ വിശ്വാസ്യത വര്ധിപ്പിക്കാനും തകരാറുകള് വേഗത്തില് കണ്ടെത്താനും അറ്റകുറ്റപ്പണികള് എളുപ്പമാക്കാനും സാധിക്കും. ട്രെയിന് സര്വീസുകളുടെ പ്രവര്ത്തനത്തില് കൂടുതല് സൗകര്യവും ഇലക്ട്രോണിക് ഇന്റര്ലോക്കിംഗ് ഉറപ്പാക്കും. കൂടാതെ, ഭാവിയില് കവച് സംവിധാനം നടപ്പാക്കുന്നതിനും ആധുനിക സിഗ്നലിങ് സംവിധാനം സഹായകമാകും.
റെയില്വേ സുരക്ഷാ അടിസ്ഥാനസൗകര്യങ്ങള് നവീകരിക്കുന്നതിന്റെ ഭാഗമായി രാജ്യത്തെ വിവിധ ഡിവിഷനുകളില് കവച് ഉള്പ്പെടെയുള്ള ആധുനിക സാങ്കേതികവിദ്യകള് വ്യാപിപ്പിക്കുന്നതിനുള്ള നടപടികള് പുരോഗമിക്കുകയാണ്.
