മൺചട്ടിയിൽ നല്ല കുടംപുളിയിട്ട മീൻ കറിയും മാങ്ങാക്കറിയും എല്ലാം രുചിച്ച കാലമുണ്ടായിരുന്നു നമ്മൾക്ക്. ഗ്യാസ് അടുപ്പും നോൺസ്റ്റിക്ക് പാത്രങ്ങളും വന്നതോടെ മൺചട്ടിയെ പലരും മറന്നു. എന്നാൽ അങ്ങനെ മറക്കാനുള്ളതല്ല മൺപാത്രങ്ങൾ. ഇവയിൽ പാകം ചെയ്യുന്നതും വിളമ്പുന്നതുമായ വിഭവങ്ങളുടെ ആരോഗ്യഗുണങ്ങൾ ഒന്ന് വേറെ തന്നെയാണ്.
മൺപാത്രത്തിൽ വിഭവങ്ങൾ തയ്യാറാക്കുന്നത് കൊണ്ട് രുചി മാത്രമല്ല ലഭിക്കുന്നത് അവ ആരോഗ്യപരമായ ഗുണങ്ങളും നൽകുന്നുണ്ട്. മൺപാത്രങ്ങളിൽ ഭക്ഷണങ്ങൾ പാചകം ചെയ്യുമ്പോൾ എണ്ണ അധികം ഉപയോഗിക്കേണ്ടിവരുന്നില്ല. ഇത് പലവിധത്തിലുള്ള ആരോഗ്യ പ്രശ്നങ്ങളിൽ നിന്നും രക്ഷ നേടാൻ സഹായിക്കുന്നു.മൺപാത്രത്തിൽ മീൻ കറി മാത്രമല്ല, എന്തു കറി പാകം ചെയ്താലും ഗുണം ഇരട്ടിയ്ക്കും.
മൺപാത്രങ്ങൾക്കായി ഉപയോഗിയ്ക്കുന്ന മണ്ണ്, അതായത് കളിമണ്ണ് പലതരം പോഷകങ്ങളാൽ നിറഞ്ഞതാണ്. ഇതിൽ വൈറ്റമിൻ ബി12, കാൽസ്യം, ഫോസ്ഫറസ്, അയേൺ, മഗ്നീഷ്യം എന്നിവയെല്ലാം ധാരാളം അടങ്ങിയിട്ടുണ്ട്. ഇവയെല്ലാം പലരീതിയിലും നമ്മുടെ ആരോഗ്യത്തെ സഹായിക്കുന്നവയാണ്.
വേനൽക്കാലത്ത് മൺപാത്രത്തിൽ നിറച്ചുവെച്ച വെള്ളം കുടിക്കുന്നത് ശരീരത്തിന് കൂടുതൽ ഉന്മേഷവും ഉണർവ്വും നൽകുന്നു.കളിമൺ കലങ്ങളിൽ സൂക്ഷിക്കുന്ന വെള്ളം ആരോഗ്യം മെച്ചപ്പെടുത്തുന്നതിനും ചൂട് തടയുന്നതിനും സഹായിക്കും. ശരീരത്തെ തണുപ്പിക്കാനും അമിതമായ ചൂട് മൂലമുണ്ടാകുന്ന പ്രശ്നങ്ങൾ തടയാനും തണുത്ത വെള്ളം സഹായിക്കും.മൺപാത്രങ്ങളിൽ സൂക്ഷിച്ചിരിക്കുന്ന വെള്ളം കുടിക്കുന്നത് ശരീരത്തിന്റെ പി.എച്ച് നിലനിർത്താനും അസിഡിറ്റിയും ഗ്യാസ്ട്രിക് പ്രശ്നങ്ങളും ഒഴിവാക്കാനും സഹായിക്കും. വേനൽക്കാലത്ത് തൊണ്ട വരളുന്നത് ഒഴിവാക്കാനുള്ള മികച്ച മാർഗമാണ് മൺപാത്രത്തിൽ നിന്നുള്ള വെള്ളം കുടിക്കുന്നത്
മൺപാത്രങ്ങൾക്കുപയോഗിയ്ക്കുന്ന മണ്ണ് ആൽക്കലൈൻ സ്വഭാവമുള്ളതാണ്. ഇതുകൊണ്ടു തന്നെ ശരീരത്തിലെ അസിഡിറ്റി കുറയ്ക്കാനും, ഭക്ഷണത്തിലെ അസിഡിറ്റി കുറയ്ക്കാനുമെല്ലാം ഏറെ നല്ലതാണ്. ഇത് വയറ്റിലെ അസിഡിറ്റി, ഗ്യാസ് പ്രശ്നങ്ങളും അസിഡിറ്റി കൂടി കുടലിൽ വ്രണം വരുന്നതുമെല്ലാം തടയുന്നു. വയറ്റിലെ അസിഡിറ്റി ഒരു പരിധിയിൽ കവിഞ്ഞു കൂടുന്നത് കുടൽ ക്യാൻസറിന് പോലും ഇടയാക്കുന്ന ഒന്നാണ്. ഭക്ഷണത്തിലെ അസിഡിറ്റി കുറയ്ക്കുന്നതു വഴി ഭക്ഷണം കൂടുതൽ രുചികരമാകുകയും ചെയ്യുന്നു.
