ന്യൂഡൽഹി:ഗൂഗിളിന്റെ ഫാമിലി ആപ്പിൽ പുതിയ ഫീച്ചറുകൾ അവതരിപ്പിച്ചു. കുട്ടികളുടെ സ്കൂൾ വിടുമ്പോഴും വീട്ടിലെത്തുമ്പോഴും മാതാപിതാക്കൾക്ക് നോട്ടിഫിക്കേഷൻ ലഭിക്കുന്ന ഫീച്ചറാണ് അതിലൊന്ന്. ആപ്പിന്റെ വെബ് വേർഷനും ഗൂഗിൾ അവതരിപ്പിച്ചിട്ടുണ്ട്. മൂന്നു ടാബുകൾ അടങ്ങിയ ഇന്റർഫേസ് ആണ് മറ്റൊരു പുതിയ ഫീച്ചർ. ഹൈലൈറ്റ് ടാബ്, കൺട്രോൾ ടാബ്, ലൊക്കേഷൻ ടാബ് എന്നിവയാണ് അവ. ഇതിലൂടെ ഓൺലൈൻ സുരക്ഷയ്ക്ക് ഒപ്പം ഓഫ് ലൈൻ സംരക്ഷണവും വാഗ്ദാനം ചെയ്തിരിക്കുകയാണ് ഗൂഗിൾ.
ഹൈലൈറ്റ് ടാബ് വഴി കുട്ടികൾ ഉപയോഗിക്കുന്നതും ഇൻസ്റ്റാൾ ചെയ്യുന്നതുമായ ആപ്പുകൾ, അവ എത്ര സമയം ഉപയോഗിക്കുന്നു, കൺട്രോൾ ചെയ്തിട്ടുള്ള ഒരു സൈറ്റ് തുറക്കാൻ അവർ ശ്രമിക്കുന്നുണ്ടോ തുടങ്ങിയ കാര്യങ്ങൾ ഒറ്റനോട്ടത്തിൽ രക്ഷിതാക്കൾക്ക് അവലോകനം ചെയ്യാൻ സാധിക്കും. കൺട്രോൾ ടാബിലൂടെ കുട്ടികളുടെ സ്ക്രീൻ സമയത്തിന് രക്ഷിതാക്കൾക്ക് പരിധി നിശ്ചയിക്കാനുള്ള സൗകര്യവും കമ്പനി ഒരുക്കുന്നുണ്ട്.
കുട്ടികൾ ഏതൊക്കെ ആപ്പുകൾ ഉപയോഗിക്കണം എന്നതിനെക്കുറിച്ചുള്ള അനുമതി നൽകാനും കൺട്രോൾ ടാബിലൂടെ സാധിക്കും. കോമൺ സെറ്റിംഗ്സിൽ മാറ്റം വരുത്താതെ ഒരു പ്രത്യേക ദിവസത്തേക്കായി സെറ്റിംഗ്സ് ക്രമീകരിക്കാനും സാധിക്കും. കുട്ടികൾ എവിടെയാണെന്ന് രക്ഷിതാക്കൾക്ക് എളുപ്പത്തിൽ മനസിലാക്കാൻ ലൊക്കേഷൻ ടാബിലൂടെ സാധിക്കും. സ്കൂളിൽ നിന്നോ വീട്ടിൽ നിന്നോ പോകുമ്പോഴോ എത്തുമ്പോഴോ മാതാപിതാക്കൾക്ക് പ്രത്യേകം അലർട്ടുകൾ ലഭിക്കുകയും ചെയ്യും. ഒരു ആപ്പ് ഡൗൺലോഡ് ചെയ്യാനോ വാങ്ങാനോ ഉള്ള കുട്ടികളുടെ അഭ്യർത്ഥനകൾ നോട്ടിഫിക്കേഷൻ ആയും മാതാപിതാക്കൾക്ക് ലഭിക്കും.
കുട്ടികളുടെ ഫോണില് ബാറ്ററി എത്രയുണ്ട് എന്നതിന് പുറമെ അലർട്ടും സെറ്റ് ചെയ്യാം. കുട്ടികൾക്കായി വാച്ച് ലിസ്റ്റും സൃഷ്ടിക്കാം.ഫോണിൽ കുട്ടികൾ കളിക്കുന്ന ഗെയിമുകൾ, കാണുന്ന വീഡിയോകൾ, അവർ ഗൂഗിളിൽ തിരയുന്ന കാര്യങ്ങൾ, ഡൗൺലോഡ് ചെയ്ത ആപ്പുകൾ എന്നിവയെക്കുറിച്ചെല്ലാമുള്ള റിപ്പോർട്ട് രക്ഷിതാക്കൾക്ക് ലഭിക്കും. മാതാപിതാക്കളുടെ സൗകര്യത്തിന് അനുസരിച്ച് ആഴ്ചയിലോ മാസത്തിലോ റിപ്പോർട്ട് ആവശ്യപ്പെടാം.
കുട്ടിയുടെ ജീവിതത്തിലെ ഓരോ നിമിഷത്തെ കുറിച്ചും നീക്കങ്ങളെക്കുറിച്ചും ഗൂഗിൾ രേഖപ്പെടുത്തുന്നതും മാതാപിതാക്കളുടെ വിവരങ്ങൾ അപ്ഡേറ്റ് ചെയ്യുന്നതും ആയ ഡാറ്റയാണ് കമ്പനി ശേഖരിക്കുന്നത്. ഇത് ഭാവിയിൽ എന്തിനെല്ലാം ഉപയോഗിക്കുമെന്ന ആശങ്കയും ആളുകൾ പങ്കുവെയ്ക്കുന്നുണ്ട്.
