നമുക്ക് നിരന്തരം ശല്യമാകുന്ന ജീവികൾ ധാരാളമാണ്. വീടിനുള്ളിൽ കയറി കൂടി നമ്മുടെ സ്വസ്ഥതയെ ഇല്ലാതാക്കുന്ന ഉറക്കം കെടുത്തുന്ന ചില ജീവികളാണ് കൊതുക്, ഈച്ച, ഉറുമ്പ്, പാറ്റ എന്നിവ. ഇവയെ വീട്ടിൽ നിന്നും തുരത്തി ഓടിക്കാൻ പല വഴികളും തേടുന്നവരാണ് നമ്മൾ. ഇതിന് ചില എളുപ്പ വഴികൾ നോക്കാം,
- കൊതുകിനെ തുരത്താൻ- കൊതുകുകളെ തടയാൻ ആദ്യം ചെയ്യേണ്ടത് അവ വളരാനുള്ള സാഹചര്യം ഇല്ലാതാക്കുക എന്നതാണ്. കെട്ടി കിടക്കുന്ന വെള്ളം, മലിനജലം, ചിരട്ടകളിലും പ്ലാസ്റ്റിക് കവറുകളിലും പാത്രങ്ങളിലുമൊക്കെ വെള്ളം കെട്ടിക്കിടക്കുന്ന അവസ്ഥ എന്നിവ ഒഴിവാക്കുക. വീടും പരിസരവും വൃത്തിയായി സൂക്ഷിക്കുക. വെളുപ്പാൻകാലത്തും സന്ധ്യയ്ക്കും സാമ്പ്രാണി, കുന്തിരിക്കം, തുളസിയില എന്നിവ പുകയ്ക്കുക. ചെറുനാരങ്ങയിൽ ഗ്രാമ്പൂ കുത്തി മുറികളിൽ വയ്ക്കുന്നത് കൊതുകിനെ തുരത്താൻ നല്ലതാണ്. അതുപോലെതന്നെ, നാരങ്ങയും ഗ്രാമ്പൂവും കറുവപ്പട്ടയും ഇട്ട് തിളപ്പിച്ച വെള്ളം തണുത്തതിന് ശേഷം റൂമിൽ സ്പ്രേ ചെയ്താൽ കൊതുക് ശല്യം ഉണ്ടാവില്ല. വെളുത്തുള്ളി ചതച്ചെടുത്ത് വെള്ളത്തിലിട്ടു ചൂടാക്കിയ ശേഷം മുറിയിൽ തളിച്ചാൽ കൊതുകിനെ അകറ്റാം.
- ഈച്ച ശല്യം ഒഴിവാക്കാൻ- തുളസി ഇല ഈച്ചകളെ തുരത്തും. തുളസിയുടെ ഇല നല്ലപോലെ അരച്ച് വീടിന്റെ പലയിടത്തും വയ്ക്കുന്നത് ഈച്ചയെ തുരത്താൻ സഹായിക്കും. ഓറഞ്ചിന്റെ തൊലി മുറികളുടെ കോർണറുകളിൽ വയ്ക്കുന്നത് ഈച്ച ശല്യം മാത്രമല്ല പാറ്റ ശല്യം അകറ്റാനും സഹായിക്കും.കർപ്പൂരം കത്തിക്കുന്നത് ഈച്ചയെ ഒഴിവാക്കാൻ നല്ലതാണ്. ഇതിന്റെ പുകയടിച്ചാൽ ഈച്ച വരില്ല. കർപ്പൂരം ചേർത്ത വെള്ളം കൊണ്ട് മേശയും മറ്റും തുടയ്ക്കുന്നതും നല്ലതാണ്.
- ഉറുമ്പ് ശല്യം- കർപ്പൂരതുളസി എണ്ണ പത്ത് തുള്ളിയെടുത്ത് വെള്ളത്തിൽ ചേർത്ത ശേഷം ഉറുമ്പ് ശല്യം ഉള്ളിടങ്ങളിൽ തളിക്കുക. ഇത് ഉറുമ്പുകളെ അകറ്റാൻ സഹായിക്കും. 5 തുള്ളി ടീ ട്രീ ഓയിൽ 2 കപ്പ് വെള്ളത്തിൽ കലക്കി ഉറുമ്പ് ശല്യം ഉള്ളിടത്ത് തളിക്കുക. കുരുമുളകോ ചുവന്ന കുരുമുളക് പൊടിയോ വിതറുക. മണ്ണെണ്ണ തളിക്കുന്നതും ഉറുമ്പുകളെ അകറ്റും.
- പാറ്റ ശല്യം- വീട്ടിലെ വൃത്തി ഇല്ലായ്മയാണ് പാറ്റകൾ പെരുകാൻ മുഖ്യ കാരണം. അഴുക്കും പൊടിയും കളഞ്ഞ് വീട് വൃത്തിയാക്കിയാൽ തന്നെ പാറ്റ ശല്യം ഇല്ലാതെയാക്കാം. കറുവ ഇലയുടെ രൂക്ഷ ഗന്ധം പാറ്റകളെ തുരത്തും. പാറ്റകൾ വരാൻ കൂടുതലായി ഉള്ള സ്ഥലങ്ങളിൽ ഈ ഇലകൾ വയ്ക്കുക. വയന ഇലയും, പനിക്കൂർക്കയുടെ ഇലയും പാറ്റകളെ അസ്വസ്ഥമാക്കും. പാറ്റ ശല്യത്തിൽ മുക്തി നേടാൻ മികച്ചൊരു ഉപാധിയാണ് ഫിനോയിൽ. ഫിനോയിൽ ഉപയോഗിച്ച് തറ തുടക്കുന്നത് പാറ്റകളെ തുരത്താൻ സഹായിക്കും.
Comments