ന്യൂഡൽഹി: കള്ളപ്പണം വെളുപ്പിക്കൽ കേസിലെ പ്രതിയായ ബോളിവുഡ് താരം ജാക്വിലിൻ ഫെർണാണ്ടസ് രാജ്യം വിടാൻ ശ്രമിച്ചതായി എൻഫോഴ്സ്മെന്റ്. നടിയുടെ ഇടക്കാല ജാമ്യത്തെ എതിർത്തുകൊണ്ട് കോടതിയിലാണ് ഇഡി ഇക്കാര്യം അറിയിച്ചത്. 200 കോടിയുടെ കള്ളപ്പണം വെളുപ്പിക്കൽ കേസിലാണ് ജാക്വിലിൻ ഫെർണാണ്ടസ് അന്വേഷണം നേരിടുന്നത്.
ജാക്വിലിൻ ഫെർണാണ്ടസിന്റെ ഇടക്കാല ജാമ്യം കോടതി നീട്ടി നൽകിയിരുന്നു. ഇതിനെതിരെയായിരുന്നു ഇഡിയുടെ വാദം. അന്വേഷണവുമായി സഹകരിക്കാൻ നടി തയ്യാറാകുന്നില്ലെന്ന് ഇഡി കോടതിയെ അറിയിച്ചു. തെളിവ് നിരത്തി കാര്യങ്ങൾ ആരായുമ്പോൾ മാത്രമാണ് നടി സത്യം പറയുന്നത്. ഇന്ത്യയിൽ നിന്നും വിദേശത്തേക്ക് കടക്കാൻ ജാക്വലിൻ ശ്രമിച്ചിരുന്നു. എന്നാൽ ലുക്ക് ഔട്ട് നോട്ടീസ് പുറപ്പെടുവിച്ചതിനാൽ ഇത് സാദ്ധ്യമായില്ല.
ജാക്വിലിൻ സാധാരണ വ്യക്തിയല്ല. വലിയ സമ്പത്തും സ്വാധീനവുമുള്ള വ്യക്തിത്വമാണ്. അതിനാൽ ജാമ്യം നൽകിയാൽ അത് കേസിനെ ബാധിക്കും. നടിയ്ക്ക് ജാമ്യം നൽകിയാൽ അത് തുടരന്വേഷണത്തെ പ്രതികൂലമായി ബാധിക്കുമെന്നും ഇഡി കോടതിയെ അറിയിച്ചു. ഇഡിയുടെ വാദങ്ങൾ കോടതി അടുത്ത മാസം 10ന് പരിഗണിക്കും. കേസിൽ കുറ്റപത്രവും മറ്റ് തെളിവുകളും ഹാജരാക്കാൻ കോടതി ഇഡിയ്ക്ക് നിർദ്ദേശം നൽകി.
