അന്നും അന്നും എന്നും ആഭരണങ്ങളോട് മനുഷ്യർക്ക് പ്രത്യേക ഇഷ്ടമാണ്. വള,മാല,കമ്മൽ,മോതിരം,മൂക്കുത്തി,പാദസ്വരം,തുടങ്ങി മനുഷ്യനണിയുന്ന ആഭരണങ്ങൾക്ക് കണക്കില്ല. നമ്മൾ മലയാളികൾക്ക് ആകർഷകമായ ഡിസൈനുകളിലുള്ള ആഭരണങ്ങൾ സ്വന്തമായിട്ടുണ്ട്. ആഭരണങ്ങളിൽ മാലയോടാണ് പലർക്കും പ്രിയം. കേരളക്കരക്ക് മാത്രം സ്വന്തമായ ചില പരമ്പരാഗത മാലകളെ പരിചയപ്പെട്ടാലോ?
പാലയ്ക്കമാല
പാലയുടെ കായയുടെ ആകൃതിയോടുകൂടിയതും നടുക്ക് തൂങ്ങുന്ന പെൻഡന്റും ചേർന്നതാണ് പാലയ്ക്കമാല. ഏത് പ്രായത്തിലുള്ളവർക്കും ചേരുന്നതും മലയാളിത്തം തുളുമ്പുന്ന ഏത് വസ്ത്രത്തിനും യോജിച്ചതും ആണ് പാലയ്ക്കമാല.പലയിടത്തും ഇത് തലമുറകളായി കൈമാറ്റം ചെയ്ത് വരാറുണ്ട്.
പവിത്രക്കെട്ട് മാല
രണ്ട് ഇഴകളും നടുക്ക് വലിയ പവിത്രക്കെട്ടും നടുവിൽ ഞാത്തും ചേർന്നതാണ് പവിത്രക്കെട്ട് മാല.
കസവുമാല
കസവിന്റെ നെയ്ത്തുപോലെ അരയിഞ്ച് വീതിയിൽ നാല് ഇഴകളായി കഴുത്തിനോട് ചേർന്ന് കിടക്കുന്ന ആഭരണമാണ് കസവുമാല. വളരെ ചെറിയ മുത്തുകൾ കോർത്ത കസവുമാലകളും പ്ലെയിൻ കസവുമാലകളും കേരളക്കരയ്ക്ക് സ്വന്തമാണ്.
കയറുപിരിമാല
കയറുപോലെ കഴുത്തിൽ ചുറ്റിപിരിഞ്ഞുകിടക്കുന്ന ഡിസൈനായതിനാലാണ് ഇതിന് ഈ പേരുവന്നത്. താലിമാലയായും പലരും കയറുപിരിമാല ഉപയോഗിക്കാറുണ്ട്.
കരിമണിമാല
വടക്കേ ഇന്ത്യയിലെ സ്ത്രീകൾ അണിയുന്ന മംഗല്യസൂത്രത്തിനോട് ഏറെ സമാനതകൾ ഉള്ള മാലയാണ് കരിമണിമാല. വിവാഹിതകളായ സ്ത്രീകളാണ് പൊതുവിൽ കരിമണി മാല അണിയുന്നത്
ഇളക്കത്താലി
ഓരോ ചെറിയ അനക്കത്തിലും ഇളകിത്തുള്ളുവാൻ പാകത്തിന് കനം തീരെ കുറഞ്ഞും അനക്കം കിട്ടാൻ പാകത്തിനും, താലികൾ മൂന്ന് നിരയായി നിരത്തി പിടിപ്പിച്ചതാണ് ഇളക്കത്താലി.
മാങ്ങാ മാല
മാങ്ങയുടെ ആകൃതിയിലുള്ളതാണ് ഈ മാല. ഇതളുകളുടെ അകം പൊള്ളയായും അല്ലാതേയുമുള്ള മാങ്ങകളുടെ മാതൃകയിൽ ഇത്തരം മാലകൾ ലഭ്യമാണ്.
രാമായണമാല
രാമായണ ഖണ്ഡങ്ങൾ ക്രമം തെറ്റാതെ ആലേഖനം ചെയ്തിട്ടുള്ളതാണിവ. ഓവൽ ആകൃതിയിൽ നിർമിച്ചിട്ടുള്ള പതക്കങ്ങളിൽ ആണ് രമായണ കഥ ആലേഖനം ചെയ്യുക.
അഷ്ടലക്ഷ്മി
എട്ട് ആലിലയിൽ ആലേഖനം ചെയ്ത അഷ്ടലക്ഷ്മി രൂപമാണ് ഈ മാലയുടെ പ്രത്യേക. ഐശ്വര്യം, ഭാഗ്യം, സന്താനം, സമ്പത്ത്, വിദ്യ തുടങ്ങിയ ജീവിത സൗഭാഗ്യങ്ങൾക്കായുള്ള പ്രാർത്ഥനയും അഴകും, ആഢ്യത്വവുമാണ് അഷ്ടലക്ഷമി മാല
