ന്യൂഡൽഹി: വാട്സ്ആപ്പ് പ്രവർത്തനം മുടങ്ങിയതായി റിപ്പോർട്ട്. ഉച്ചയ്ക്ക് 12.30ഓടെയാണ് വാട്സ്ആപ്പ് പ്രവർത്തനം നിലച്ചത്. ഇന്ത്യയടക്കം നിരവധി രാജ്യങ്ങളിൽ വാട്സാപ്പ് സേവനം മുടക്കിയിട്ടുണ്ട്.
മെറ്റ ഉടമസ്ഥതയിലുള്ള ഇൻസ്റ്റന്റ് മെസേജിംഗ് ആപ്ലിക്കേഷനായ വാട്സ്ആപ്പിൽ സന്ദേശങ്ങൾ അയക്കുന്നതും ലഭിക്കുന്നതും സ്റ്റാറ്റസ് അപ്ഡേറ്റുകൾ ചെയ്യുന്നതുമെല്ലാം തടസപ്പെട്ടിരിക്കുകയാണ്. പേഴ്സണൽ ചാറ്റുകളും ഗ്രൂപ്പ് ചാറ്റുകളും എല്ലാം സ്തംഭിച്ചിട്ടുണ്ട്. വാട്സ്ആപ്പ് വെബ് വഴി കണക്ട് ചെയ്യാൻ ശ്രമിക്കുന്നവർക്കും ആപ്പ് ലഭ്യമല്ലെന്നാണ് വിവരം.
സംഭവത്തിൽ ഇതുവരെ വാട്സ്ആപ്പ് അധികൃതർ പ്രതികരണമറിയിച്ചിട്ടില്ല. ഇതിന് മുമ്പും ഇത്തരത്തിൽ വാട്സ്ആപ്പ് പണിമുടക്കിയിട്ടുണ്ട്. സാങ്കേതിക തകരാർ പരിഹരിച്ച് ഏതാനും മണിക്കൂറുകൾക്ക് ശേഷം പ്രവർത്തനം പുനരാരംഭിക്കുകയും ചെയ്യുന്നതാണ് പതിവ്.
പ്രവർത്തനം മുടങ്ങിയതോടെ വാട്സ്ആപ്പിന്റെ സമൂഹമാദ്ധ്യമ അക്കൗണ്ടുകളിലൂടെ നിരവധി ഉപഭോക്താക്കൾ ഇക്കാര്യം കമ്പനിയുടെ ശ്രദ്ധയിൽപെടുത്തിയിട്ടുണ്ട്. വൈകാതെ തകരാർ പരിഹരിക്കുമെന്ന പ്രതീക്ഷയിലാണ് ഉപഭോക്താക്കൾ.
