രാജ്യത്ത് കേന്ദ്രസർക്കാർ ആരംഭിച്ച നിരവധി പദ്ധതികളാണ് സാധാരണക്കാർക്ക് തണലേകുന്നത്. അതിലൊന്നാണ് ഗർഭിണികൾക്ക് 5000 രൂപയുടെ ധനസഹായം നൽകുന്ന പ്രധാനമന്ത്രി മാതൃവന്ദനാ യോജന(PMMVY). പദ്ധതിയുടെ ഗുണങ്ങളെപ്പറ്റി ജനങ്ങളെ ബോദ്ധ്യപ്പെടുത്തുകയാണ് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ. 2017 ജനുവരി 1-നാണ് പ്രധാനമന്ത്രി നരേന്ദ്രമോദി ഈ പദ്ധതി ആരംഭിക്കുന്നത്. ആദ്യമായി ഗർഭിണികളാകുന്ന സ്ത്രീകൾക്ക് ഈ പദ്ധതി സഹായകമാകുന്നു. ഈ പദ്ധതിയിലൂടെ സ്ത്രീകൾക്ക് സാമ്പത്തിക സഹായം ലഭിക്കും.
ഗർഭിണികൾക്കും മുലയൂട്ടുന്ന അമ്മമാർക്കും മെച്ചപ്പെട്ട ആരോഗ്യവും പോഷകാഹാരവും നൽകാനും പോഷകാഹാരക്കുറവിൽ നിന്ന് അവരുടെ കുട്ടിയെ സംരക്ഷിക്കാനും മരണനിരക്ക് കുറയ്ക്കാനും പദ്ധതി ലക്ഷ്യമിടുന്നു. ഈ പദ്ധതി പ്രകാരം ഗർഭിണികൾക്ക് അവരുടെ ബാങ്ക് അക്കൗണ്ടിൽ ഗഡുക്കളായാണ് സർക്കാർ 5000 രൂപ നൽകുന്നത്. മൂന്ന് ഗഡുക്കളായാണ് സർക്കാർ ധനസഹായം. ആദ്യം,1000 രൂപ ലഭിക്കും. പരിശോധനയ്ക്കായി രണ്ടാമത്തെ ഗഡുവായ 2000 പിന്നാലെ ലഭിക്കും. കുട്ടിക്ക് വാക്സിനുകൾ നൽകുമ്പോൾ ബാക്കി തുകയും സർക്കാർ അമ്മമാർക്ക് നൽകുന്നു.
അംഗൻവാടിയിൽ പേര് രജിസ്റ്റർ ചെയ്ത് നേരിട്ട് ധനസഹായം ബാങ്ക് വഴി നേടാം. പദ്ധതിയെ കുറിച്ചുള്ള സംശയങ്ങൾ ഉണ്ടെങ്കിൽ ഫെയ്സ്ബുക്ക് പോസ്റ്റിന് താഴെ കമന്റായി ചോദിച്ചാൽ ഉത്തരം നൽകുമെന്ന് കെ.സുരേന്ദ്രൻ പറയുന്നു. പ്രധാനമന്ത്രി മാതൃവന്ദനാ യോജനയുടെ ഔദ്യോഗിക വെബ്സൈറ്റിൽ രജിസ്റ്റർ ചെയ്യാൻ താഴെ നൽകുന്ന ലിങ്ക് ക്ലിക്ക് ചെയ്യുക.
