ന്യൂഡൽഹി: ലോകത്തെ ഏറ്റവും 10 തിരക്കേറിയ എയർപോർട്ടുകളിൽ ഒന്നായി ന്യൂഡൽഹി ഇന്ദിരാ ഗാന്ധി അന്താരാഷ്ട്ര വിമാനത്താവളം. ഒക്ടോബറിൽ 3.3 ദശലക്ഷം യാത്രക്കാരാണ് വിമാനത്താവളത്തിലൂടെ കടന്ന് പോയത്. പ്രശസ്ത ഏവിയേഷൻ അനലറ്റിക്സ് സ്ഥാപനം ഒഎജിയുടെ റിപ്പോർട്ട് പ്രകാരം വിമാനത്താവളം 2019 മുതൽ(കൊറോണയ്ക്ക് മുമ്പ്)റാങ്കിങ് മെച്ചപ്പെടുത്തി കൊണ്ടിരിക്കുകയാണ്.
ഒക്ടോബറിലെ ഏറ്റവും തിരക്ക് അനുഭവപ്പെട്ട വിമാനത്താവളം അറ്റലാന്റ ഹാർട്സ്ഫീൽഡ് ജാക്സൺ ആണ്. ഇവിടെ 4.7 മില്യൺ യാത്രക്കാരാണ്(അഭ്യന്തരവും വിദേശവും ഉളപ്പെടെ) കടന്നു പോയത്. കഴിഞ്ഞ മാസത്തേക്കാൾ മൂന്ന് ശതമാനം വളർച്ചയാണ് അറ്റ്ലാന്റ എയർപോർട്ട് കൈവരിച്ചത്.
ദുബായ്, ടോക്യോ ഹനേദ എയർപോർട്ടുകളാണ് യഥാക്രമം രണ്ടും മൂന്നും സ്ഥാനങ്ങളിൽ. കഴിഞ്ഞമാസം നാലാം സ്ഥാനത്തായിരുന്ന ഈസ്താംബൂൾ എയർപോർട്ട് എട്ടാം സ്ഥാനത്തേക്ക് പിന്തളളപ്പെട്ടു. ഇവിടെ യാത്രക്കാരുടെ എണ്ണത്തിൽ ആറ് ശതമാനം കുറവുണ്ടായി. അമേരിക്കയിലെ ഡളളാസ് എയർപോർട്ടാണ് നാലാം സ്ഥാനത്തെത്തിയത്. കഴിഞ്ഞ മാസം 12ാം സ്ഥാനത്ത് നിന്നാണ് ഈ സ്ഥാനക്കയറ്റം. 20ാം സ്ഥാനത്ത് നിന്ന് മുന്നേറിയ ഡെൻവർ വിമാനത്താവളം ആണ് ആറാമത്തെത്തിയത്.
ഡൽഹി 14ാം സ്ഥാനത്ത് നിന്നാണ് 10ലേക്ക് മുന്നേറിയത്. അന്താരാഷ്ട്ര യാത്രക്കാരുടെ എണ്ണത്തിൽ അഞ്ചാം സ്ഥാനത്ത് എത്തിയത് ഫ്രാങ്ക്ഫർട്ട് വിമാനത്താവളമാണ്. ഏറ്റവുമധികം അന്താരാഷ്ട്ര യാത്രക്കാർ വന്നിറങ്ങിയ എയർപോർട്ട് എന്ന സ്ഥാനം ദുബായ് നിലനിർത്തി. ഇവിടെ 41 ദശലക്ഷം അന്താരാഷ്ട്ര യാത്രക്കാരാണ് കടന്നുപോയത്. ലണ്ടനിലെ ഹീത്രൂ വിമാനത്താവളം ആണ് രണ്ടാമത്. ആംസ്റ്റർഡാം, പാരീസ് എന്നീ എയർപോർട്ടുകൾ നാലും അഞ്ചും സ്ഥാനങ്ങളിലുണ്ട്.
Comments