തിരുവനന്തപുരം: ലോക സ്ട്രോക്ക് ദിനത്തോടനുബന്ധിച്ച് ബോധവൽക്കരണ പരിപാടിയുമായി കിംസ്ഹെൽത്ത്. ‘സിറ്റി ഫാസ്റ്റ്’ എന്ന പേരിൽ സംഘടിപ്പിച്ച ബോധവൽക്കരണ പരിപാടി തിരുവനന്തപുരം നഗരത്തിന്റെ വിവിധ ഭാഗങ്ങളിലായാണ് നടത്തിയത്. കിംസ് കോളേജ് ഓഫ് നേഴ്സിംഗിലെ അൻപതിൽപ്പരം വിദ്യാർത്ഥികളുടെ നേതൃത്വത്തിൽ സ്‌കിറ്റും, ഫ്ളാഷ് മോബും ഇതിന്റെ ഭാഗമായി സംഘടിപ്പിച്ചു.
കാർമൽ ഗേൾസ് ഹയർസെക്കൻഡറി സ്‌കൂൾ, എൽ.ബി.എസ് ഇൻസ്റ്റിറ്റ്യൂട്ട് ഓഫ് ടെക്‌നോളജി ഫോർ വുമൺ പൂജപ്പുര, യു.എസ്.ടി ക്യാംപസ്, ഡിജിറ്റൽ യൂണിവേഴ്സിറ്റി ഓഫ് കേരള, കിംസ്ഹെൽത്ത് തുടങ്ങിയ സ്ഥലങ്ങളിലായായിരുന്നു ബോധവൽക്കരണം. വർധിച്ചുവരുന്ന സ്ട്രോക്ക് രോഗികളുടെ എണ്ണം മുൻനിർത്തി ജനങ്ങളിൽ അവബോധം സൃഷ്ടിക്കാനാണ് ബോധവൽക്കരണ പരിപാടി സംഘടിപ്പിച്ചത്. സ്ട്രോക്ക് ബാധിച്ച രോഗികളെ എത്രയും വേഗം വിദഗ്ധ ചികിത്സ ലഭ്യമാകുന്ന ആശുപത്രിയിൽ എത്തിക്കേണ്ടതിന്റെ ആവശ്യകത ജനങ്ങളിലെത്തിക്കാനും സമയത്തിന്റെ പ്രാധാന്യം ബോധ്യപ്പെടുത്താനും ലക്ഷ്യമിട്ട് നടത്തിയ പരിപാടിക്ക് മികച്ച പിന്തുണയാണ് നഗരത്തിന്റെ വിവിധ ഭാഗങ്ങളിൽ നിന്നായി ലഭിച്ചത്.
സൈബർ സെക്യൂരിറ്റി സബ്ഡിവിഷൻ അസിസ്റ്റന്റ് കമ്മീഷണർ ഹരി സി.എസ് പരിപാടി ഉദ്ഘാടനം ചെയ്തു. കേവലം സ്ട്രോക്ക് ദിനാചരണത്തിനപ്പുറം, ജനങ്ങളിൽ കൃത്യമായ അവബോധം സൃഷ്ടിക്കാൻ കിംസ്ഹെൽത്തിന് കഴിഞ്ഞെന്നും ഇതിൽ നിന്നും ഉൾക്കൊള്ളുന്ന പാഠങ്ങൾ എന്നെന്നും ഓർത്തുവെയ്‌ക്കേണ്ടതാണെന്നും അദ്ദേഹം പറഞ്ഞു. നമുക്ക് ചുറ്റുമുള്ള ആർക്കെങ്കിലും ഇത്തരത്തിൽ ഒരു രോഗാവസ്ഥ വന്നാൽ എങ്ങനെ രക്ഷിക്കാം എന്ന് നാം ജാഗരൂകരായിരിക്കണം. ആരോഗ്യമാണ് ഏറ്റവും പ്രധാനമെന്ന് തിരിച്ചറിഞ്ഞ് ആരോഗ്യപരിപാലനത്തിൽ ശ്രദ്ധ കേന്ദ്രീകരിക്കണമെന്നും ആവശ്യമായ ചികിത്സ കൃത്യസമയത്ത് നേടണമെന്നും അദ്ദേഹം കൂട്ടിച്ചേർത്തു.
രോഗികളും, അവർക്ക് ചുറ്റുമുള്ളവരും പലപ്പോഴും സമയത്തിന്റെ വില മനസ്സിലാക്കാറില്ലെന്നും സ്ട്രോക്ക് ചികിത്സയിൽ ഏറ്റവും പ്രാധാന്യം സമയത്തിനാണെന്ന് തിരിച്ചറിയണമെന്നും കിംസ്ഹെൽത്ത് ചെയർമാൻ ആൻഡ് മാനേജിംഗ് ഡയറക്ടർ ഡോ. എം.ഐ സഹദുള്ള പറഞ്ഞു. രോഗികളെ കൃത്യസമയത്ത് ആശുപത്രിയിൽ എത്തിക്കാനായി ട്രാഫിക്ക് നിയന്ത്രിക്കുന്നതിൽ പോലീസ് വലിയ പങ്കാണ് വഹിക്കുന്നത്. കേരളത്തിലെ ജനങ്ങൾ വിദ്യാഭ്യാസത്തിൽ മുൻപന്തിയിലാണെങ്കിലും പലപ്പോഴും ആരോഗ്യപരിപാലനത്തിന്റെയും, സമയത്ത് ചികിത്സ തേടുന്നതിന്റെയും പ്രാധാന്യം തിരിച്ചറിയാറില്ല. സ്ട്രോക്ക് ചികിത്സയിൽ സമയത്ത് വിദഗ്ധ ചികിത്സ ലഭ്യമാക്കലാണ് ഏറ്റവും പ്രാധാന്യമുള്ളതെന്ന് തിരിച്ചറിയണമെന്നും അദ്ദേഹം കൂട്ടിച്ചേർത്തു.
കിംസ്ഹെൽത്തിലെ ന്യൂറോളജി വിഭാഗം സീനിയർ കൺസൾട്ടന്റും ചീഫ് കോഓർഡിനേറ്ററുമായ ഡോ. സുരേഷ് ചന്ദ്രൻ, സ്ട്രോക്ക് ഡേ സന്ദേശം നൽകി. കിംസ്ഹെൽത്ത് ന്യൂറോളജി വിഭാഗം സീനിയർ കൺസൾട്ടന്റും അക്കാദമിക് കോഓർഡിനേറ്ററുമായ ഡോ. ശ്യാംലാൽ എസ് സ്വാഗതവും കിംസ്ഹെൽത്ത് സി.ഇ.ഒ ജെറി ഫിലിപ്പ് നന്ദിയും പറഞ്ഞു.
