മലപ്പുറം: കരിപ്പൂർ വിമാനത്താവളത്തിൽ വീണ്ടും സ്വർണവേട്ട. രഹസ്യമായി കടത്താൻ ശ്രമിച്ച സ്വർണവുമായി ഒരാളെ പിടികൂടി. മറ്റൊരു സംഭവത്തിൽ സ്വർണം കടത്തിയ ആളും ഇത് തട്ടാനെത്തിയ സംഘവും പോലീസ് പിടിയിലായി.
മലപ്പുറം തലക്കടത്തൂർ സ്വദേശി പാറമ്മൽ റഷീദ് (49)നെയാണ് കോഴിക്കോട് കസ്റ്റംസ് വിഭാഗം പിടികൂടിയത്. മലദ്വാരത്തിൽ ഒളിപ്പിച്ചായിരുന്നു റഷീദ് സ്വർണം കടത്താൻ ശ്രമിച്ചത്. 1286 ഗ്രാം സ്വർണം മിശ്രിതമാക്കി ക്യാപ്‌സൂൾ രൂപത്തിലാക്കിയായിരുന്നു മലദ്വാരത്തിൽ ഒളിപ്പിച്ചത്. ഇതിന് വിപണിയിൽ 60 ലക്ഷം രൂപ വിലവരുമെന്ന് കസ്റ്റംസ് അറിയിച്ചു.
ദുബായിൽ നിന്നും സ്വർണവുമായി എത്തിയ കണ്ണൂർ തളിപ്പറമ്പ് സ്വദേശി നടുവിൽ മുഹമ്മദ് അനീസിനെയും നാലംഗ സംഘത്തെയുമാണ് കരിപ്പൂർ വിമാനത്താവളത്തിൽ നിന്നും പോലീസ് പിടികൂടിയത്. അനീസിന്റെ നിർദ്ദേശ പ്രകാരം ആയിരുന്നു സംഘം സ്വർണം തട്ടാൻ എത്തിയത്. എന്നാൽ ഇത് ആസൂത്രണം ചെയ്യുന്നതിനിടെ സംഘം പോലീസിന്റെ പിടിയിൽ ആകുകയായിരുന്നു. തലശേരി കതിരൂർ പൊന്ന്യം വെസ്റ്റ് സ്വദേശി പ്രസാദ്, തലശേരി ചാലിൽ റോഡ് കിരൺ, കണ്ണൂർ ധർമടം കളത്തിൽ വളപ്പിൽ നിയാസ്, തളിപ്പറമ്പ് നടുവിൽ ഗിരീഷ് എന്നിവരാണ് പിടിയിലായതെന്ന് പോലീസ് പറഞ്ഞു. ഇവരുടെ പക്കൽ നിന്നും രണ്ടര ലക്ഷം രൂപ മൂല്യമുള്ള ഐഫോണുകളും 54 ഗ്രാം സ്വർണവും പിടിച്ചെടുത്തിട്ടുണ്ട്.
