250 കോടിയിലേറെ കളക്ഷൻ സ്വന്തമാക്കി ഋഷഭ് ഷെട്ടിയുടെ കാന്താര തിയേറ്ററുകളിൽ ജൈത്രയാത്ര തുടരുകയാണ്. തെന്നിന്ത്യയിൽ മാത്രമല്ല ബോളിവുഡിൽ നിന്നും മികച്ച പ്രതികരണമാണ് ചിത്രത്തിന് ലഭിക്കുന്നത്. നിരവധി പേരാണ് ചിത്രത്തിന് പ്രശംസയുമായി ഇതിനൊടകം രംഗത്തെത്തിയിരിക്കുന്നത്. മാത്രമല്ല അഭിനന്ദനം അറിയിച്ച് സൂപ്പർ സ്റ്റാർ രജനീകാന്തും എത്തിയിരുന്നു.
ട്വിറ്ററിലൂടെയായിരുന്നു അദ്ദേഹം അഭിനന്ദനവുമായി രംഗത്തെത്തിയത്. ‘അറിയുന്നതിനേക്കാൾ കൂടുതലാണ് അജ്ഞാതമായത്. കാന്താര സിനിമ എന്നിൽ രോമാഞ്ചം സൃഷ്ടിച്ചു. ഒരു എഴുത്തുകാരൻ, സംവിധായകൻ, നടൻ എന്നീ നിലകളിൽ ഋഷഭ് തിളങ്ങി. താങ്കൾക്ക് അഭിവാദ്യങ്ങൾ. ഇന്ത്യൻ സിനിമയിലെ ഈ മാസ്റ്റർപീസിന് പിന്നിൽ പ്രവർത്തിച്ച മുഴുവൻ അഭിനേതാക്കളെയും അണിയറപ്രവർത്തകരെയും ഞാൻ അഭിനന്ദിക്കുന്നു എന്നായിരുന്നു അദ്ദേഹത്തിന്റെ വാക്കുകൾ.
എന്നാൽ ഇപ്പോഴിതാ ഋഷഭ് ഷെട്ടി രജനീകാന്തിനെ നേരിൽ കണ്ട് അനുഗ്രഹം വാങ്ങിയതിന്റെ ചിത്രങ്ങളാണ് സമൂഹമാദ്ധ്യമങ്ങളിൽ പ്രചരിക്കുന്നത്. രജനീകാന്തിന്റെ ചെന്നൈയിലുള്ള വസതിയിലെത്തി താരത്തിന്റെ കാൽതൊട്ടുവണങ്ങിയാണ് ഋഷഭ് അനുഗ്രഹം വാങ്ങിയിരിക്കുന്നത്. ശേഷം ഏറെനേരംഇരുവരും ഒരുമിച്ച് ചിലവഴിക്കുകയും ചെയ്തു.കാന്താരയുടെ നിർമാണ കമ്പനിയായ ഹോംബാലെയും താരങ്ങൾ ഒന്നിച്ചുള്ള ചിത്രങ്ങൾ പങ്കുവച്ചിട്ടുണ്ട്. മാസ്റ്ററും ശിഷ്യനും എന്ന ക്യാപ്ഷനോടെയാണ് ഇവർ ചിത്രങ്ങൾ പങ്കുവച്ചത്.
പത്തൊമ്പതാം നൂറ്റാണ്ടിന്റെ പശ്ചാത്തലത്തിൽ കഥ പറയുന്ന കാന്താര തീരദേശ കർണാടകത്തിലെ ഒരു ഗ്രാമവും അവിടത്തെ ദൈവനർത്തക വിശ്വാസവുമാണ് ചർച്ച ചെയ്യുന്നത്. ചിത്രത്തിലെ ഋഷഭ് ഷെട്ടിയുടെ പ്രകടനവും എടുത്തുപറയേണ്ടതാണ്.
കെ.ജി.എഫ് ചാപ്റ്റർ ഒന്നിനെ മറികടന്ന് കർണാടക ബോക്സോഫീസിലെ എക്കാലത്തേയും വലിയ രണ്ടാമത്തെ ബ്ലോക്ബസ്റ്റർ ചിത്രമായിരിക്കുകയാണ് കാന്താര. നിലവിൽ കെ.ജി.എഫ് ചാപ്റ്റർ രണ്ട് മാത്രമാണ് ഋഷഭ് ഷെട്ടി ചിത്രത്തിന് മുന്നിലുള്ളത്.
