ഭോപ്പാൽ : മഹാത്മാഗാന്ധിയുടെ പ്രതിമ തകർത്ത് സാമൂഹ്യവിരുദ്ധർ. മധ്യപ്രദേശിലെ ഖണ്ട്വ ജില്ലയിൽ സ്ഥാപിച്ചിരുന്ന ഗാന്ധി പ്രതിമയാണ് സാമൂഹ്യവിരുദ്ധർ തകർത്തത്. കേസെടുത്ത് പോലീസ്.ജവാർ ഗ്രാമപഞ്ചായത്ത് സെക്രട്ടറി ദേവരാജ് സിംഗ് നൽകിയ പരാതിയെ തുടർന്നാണ് പോലീസിന്റെ നടപടി.
കഴിഞ്ഞ ദിവസം രാത്രിയാണ് സംഭവം നടന്നതെന്ന് ജവാർ പോലീസ് സ്റ്റേഷൻ ഇൻചാർജ് ശിവ്‌റാം ജാട്ട് പറഞ്ഞു. അജ്ഞാതരായ കുറ്റവാളികൾക്കെതിരെ ഇന്ത്യൻ ശിക്ഷാ നിയമത്തിലെ വിവിധ വകുപ്പുകളുടെ അടിസ്ഥാനത്തിൽ കേസ് രജിസ്റ്റർ ചെയ്തിട്ടുണ്ട്. കുറ്റാവാളികളെ കണ്ടെത്തുന്നതിനുള്ള അന്വേഷണം ആരംഭിച്ചിട്ടുണ്ടെന്നും അദ്ദേഹം വ്യക്തമാക്കി.
ഗാന്ധി പ്രതിമ തകർത്ത സംഭവം ഗ്രാമവാസികളിൽ പ്രതിഷേധത്തിന് വഴിതെളിയിച്ചിരിക്കുകയാണ്. കുറ്റവാളികൾക്കെതിരെയും അതിൽ പങ്കു ചേർന്നവർക്കെതിരെയും കശന നടപടി സ്വീകരിക്കുമെന്ന് കോൺഗ്രസ് പ്രവർത്തകൻ കുന്ദൻ മാളവ്യ പറഞ്ഞു.
കുറച്ച് നാൾ മുമ്പാണ് ബിഹാറിൽ ചമ്പാരൻ സത്യാഗ്രഹം ആരംഭിച്ച സ്ഥലത്തിന് സമീപം സ്ഥാപിച്ചിരുന്ന മഹാത്മാഗാന്ധിയുടെ പ്രതിമ സമൂഹ്യവിരുദ്ധർ നശിപ്പിച്ചത്.ചർക്ക പാർക്കിലെ ഗാന്ധി പ്രതിമയാണ് കേടുപാടുകൾ വരുത്തി നിലത്ത് തള്ളിയ നിലയിൽ കണ്ടെത്തിയത്.
