ഒരു മനുഷ്യന്റെ തല കടിച്ചെടുത്തുകൊണ്ട് ഓടുന്ന തെരുവ് നായയുടെ ഭീതിപടർത്തുന്ന വീഡിയോയാണ് ഇപ്പോൾ സമൂഹമാദ്ധ്യമങ്ങളിൽ ചർച്ചയാകുന്നത്. മെക്‌സിക്കോയിലെ സകാറ്റെകസിൽ നിന്നുള്ളതാണ് ഈ വീഡിയോ. കഴിഞ്ഞയാഴ്ചയാണ് മെക്‌സിക്കൻ തെരുവിൽ ഈ സംഭവം നടന്നത്. വഴിയാത്രക്കാരാണ് തെരുവ് നായയുടെ ഈ ദൃശ്യങ്ങൾ പകർത്തിയത്. പിന്നീട് ഇവരത് സമൂഹമാദ്ധ്യമങ്ങളിൽ പങ്കുവെയ്‌ക്കുകയായിരുന്നു.
മോണ്ടെ എസ്‌കോബെഡോയിൽ എടിഎമ്മിൽ ഉപേക്ഷിക്കപ്പെട്ട നിലയിൽ മനുഷ്യന്റെ തല കണ്ടെത്തിയിരുന്നു. ഒരു പെട്ടിയ്‌ക്കുള്ളിലാണ് തല വെച്ചിരുന്നത്. ” അടുത്ത തല നിന്റെ ” എന്ന മുന്നറിയിപ്പും ഇതിലുണ്ടായിരുന്നു. ഇത് നീക്കം ചെയ്യുന്നതിന് മുൻപ് നായ കടിച്ചെടുത്ത് കൊണ്ടുപോയതാകാമെന്നാണ് നിഗമനം.
തലയുമായി ഏറെ ദൂരം നായ ഓടുന്നത് വീഡിയോയിൽ കാണാം. ഇതിനെ പിന്തുടർന്ന് കൊണ്ടാണ് വാഹനത്തിലെ യാത്രക്കാർ വീഡിയോ പകർത്തിയിരിക്കുന്നത്.
പ്രദേശത്തുള്ള ലഹരിക്കടത്ത് സംഘങ്ങൾ തമ്മിലുണ്ടായ തർക്കമാകാം കൊലപാതകത്തിന് ഇടയാക്കിയതെന്നും സൂചനയുണ്ട്. കാർട്ടൽ ജാലിസ്‌കോ ന്യൂവ ജനറേഷ്യൻ എന്ന സംഘമാണ് ഈ കൊലയ്‌ക്ക് പിന്നിലെന്നും റിപ്പോർട്ടുകൾ പുറത്തുവരുന്നുണ്ട്. ലഹരിമാഫിയകൾ തമ്മിലുളള നിരന്തര ഏറ്റുമുട്ടലുകളും രക്തച്ചൊരിച്ചിലുകളും സകറ്റെക്കസിൽ പതിവാണ്. ലോകത്തിലെ തന്നെ ഏറ്റവും ഭീകരരായ ലഹരിക്കടത്ത് സംഘങ്ങൾ മെക്‌സിക്കോയിലുണ്ടെന്നും ഇതിന്റെ തെളിവാണ് ഇപ്പോൾ പുറത്തുവന്നിരിക്കുന്ന എന്നും ആളുകൾ സമൂഹമാദ്ധ്യമങ്ങളിലും ചൂണ്ടിക്കാട്ടുന്നു.
