അമരാവതി: തെലങ്കാന രാഷ്‌ട്ര സമിതി പാർട്ടിക്കെതിരായ രാഹുൽ ഗാന്ധിയുടെ പരാമർശങ്ങൾക്ക് മറുപടിയുമായി ടിആർഎസ് നേതാവും തെലങ്കാന മന്ത്രിയുമായ കെടി രാമറാവു. ട്വിറ്ററിലൂടെ വയനാട് എംപിയെ കണക്കിന് പരിഹസിച്ചിരിക്കുകയാണ് കെടി രാമറാവു.
അമേഠിയിൽ സ്വന്തം ..പാർലമെന്റ് സീറ്റ് നിലനിർത്താൻ പോലും കഴിയാത്ത ദേശീയ നേതാവ് രാഹുൽ ഗാന്ധി തെലങ്കാന മുഖ്യമന്ത്രി കെസിആറിന്റെ ദേശീയ പാർട്ടിയാവാനുള്ള അഭിലാഷത്തെ പരിഹസിക്കുന്നു. തന്നെ എംപിയായി തിരഞ്ഞെടുക്കാൻ ‘ഭാവി പ്രധാനമന്ത്രി’ ആദ്യം തന്റെ ജനങ്ങളെ ബോധ്യപ്പെടുത്തണം, എന്നായിരുന്നു മന്ത്രിയുടെ ട്വീറ്റ്.
കഴിഞ്ഞ ദിവസം വാർത്താ സമ്മേളനത്തിൽ വെച്ച് തെലങ്കാന രാഷ്‌ട്ര സമിതിയുമായുള്ള സഖ്യത്തിനുള്ള സാധ്യതയ രാഹുൽ ഗാന്ധി തള്ളിയിരുന്നു ടിആർഎസും കോൺഗ്രസും തമ്മിൽ യാതൊരു ബന്ധത്തിനും സാധ്യതയില്ലെന്നും അദ്ദേഹം പറഞ്ഞു.കോൺഗ്രസിന്റെ നിലപാടിന് തികച്ചും വിരുദ്ധമാണ് ടിആർഎസ്.അവരുടെ അഴിമതിയും സമീപനവും മനോഭാവവും ഞങ്ങൾക്ക് സ്വീകാര്യമല്ല. അവർ ചെയ്യുന്ന കാര്യങ്ങൾക്ക് തങ്ങൾ വിപരീതമാണെന്ന് രാഹുൽ ഗാന്ധി കുറ്റപ്പെടുത്തിയിരുന്നു.
ഇതിന് പിന്നാലെയാണ് 2019 ലെ ലോക്‌സഭാ തിരഞ്ഞെടുപ്പിൽ അമേഠിയിൽ സ്മൃതി ഇറാനിയോട് തോറ്റതും, വയനാട്ടിലെ മണ്ഡലത്തിൽ നിന്ന് വിജയിച്ചതും തെലങ്കാനമന്ത്രി ചൂണ്ടിക്കാട്ടി പരിഹസിച്ചത്.
