നമ്മുടെ ഭക്ഷണത്തിൽ ഒഴിച്ചകൂടാൻ കഴിയാത്ത പച്ചക്കറിയാണ് സവാള. സവാള ചേർക്കാത്ത കറികളില്ലെന്ന് പറയാം. ഒരു കറി വെക്കണമെങ്കിൽ എത്ര സവാളയാണ് അരിഞ്ഞരിഞ്ഞ് ഉപയോഗിക്കുന്നത്. എന്നിട്ടിതിന്റെ തൊലി എന്ത് ചെയ്യും? ദൂരെ കൊണ്ട് കളയും അല്ലേ? എന്നാലിനി സവാള തൊലി കളയും മുൻപ് ഒന്ന് ചിന്തിക്കൂ. പോഷകങ്ങളുടെ ഒരു കലവറയാണ് നാം തൊടിയിലേക്ക് വലിച്ചെറിഞ്ഞ് കളയുന്നത്.
സവാള തൊലി ഉപയോഗിച്ച് അതിശയകരമായ ഒരു ഡ്രിങ്ക് തയ്യാറാക്കിയാൽ ആരോഗ്യഗുണങ്ങൾ ഏറെയാണെന്നാണ് വിദഗ്ധർ പറയുന്നത്. വിറ്റാമിൻ എ,സി സമ്പന്നമായ ഈ ചായ കണ്ണുകളുടെ ആരോഗ്യത്തിന് ഏറെയാണ്. ചർമ്മരോഗങ്ങൾക്ക് പലതിനും ശമനം നൽകാൻ ഈ ചായ പതിവായി കുടിച്ചാൽ മതി.സവാള തൊലികളിൽ ആന്റിഫംഗൽ ഗുണങ്ങളുമുണ്ട്. ചർമ്മത്തിൽ എന്തെങ്കിലും തരത്തിലുള്ള ചൊറിച്ചിലോ ചുണങ്ങോ നേരിടേണ്ടി വരുന്നുണ്ടെങ്കിൽ ചായ ഇതിന് പരിഹാരം നൽകും.
ചുമ, പനി എന്നിവയുടെ ലക്ഷണങ്ങളെ നിയന്ത്രിക്കാനും, സീസണൽ അണുബാധയുടെ സാധ്യതകളെ ഒഴിവാക്കാനും സഹായിക്കുന്ന ആന്റി-ഇൻഫ്ലമേറ്ററി, ആൻറി ഓക്സിഡൻറ് ഗുണങ്ങൾ കൊണ്ട് നിറഞ്ഞതാണ്. സവാള തൊലികൾ ഉപയോഗിച്ചു കൊണ്ടുണ്ടാക്കുന്ന ചായയിൽ കലോറി തീരെ കുറവായിരിക്കും.അതിനാൽ തന്നെ ശരീരഭാരം കുറയ്ക്കാൻ ആഗ്രഹിക്കുന്നവർക്ക് കുടിക്കാൻ പറ്റുന്ന മികച്ച പാനീയമാണിത്.സവാള തൊലികളിലുള്ള ഫ്ലേവനോയ്ഡുകൾ ഹൃദയത്തിന്റെ ആരോഗ്യത്തിനും നല്ലതാണ്.
സവാള തൊലി കൊണ്ടുള്ള ചായ എങ്ങനെ ഉണ്ടാക്കാം?
സവാളയിൽ നിന്നെടുത്ത തൊലികൾ കുറച്ച് മിനിറ്റ് വെള്ളത്തിൽ ഇട്ട് തിളപ്പിച്ചാൽ മാത്രം മതി. ഈ പാനീയം അരിച്ചൊഴിച്ച ശേഷം കുടിക്കുക. ചായയിൽ ഒരൽപം ഇഞ്ചിയും തേനും കൂടി ചേർത്താൽ കൂടുതൽ രുചികരമാകും. ഇത് കൂടാതെ ചായ തയ്യാറാക്കുമ്പോൾ ചായപ്പൊടിക്കൊപ്പം സവാള തൊലി കൂടെ ചേർക്കാവുന്നതാണ്.
സവാള ചായ ഉണ്ടാക്കുന്നതിന് മുൻപ് ശ്രദ്ധിക്കേണ്ട കാര്യം നന്നായി കഴുകി വൃത്തിയാക്കി ഉണക്കിയിട്ട് വേണം ഉപയോഗിക്കാൻ, കൂടാതെ കീടനാശിനികൾ തളിച്ചതോ,കേടായ സാവളയുടേയോ തൊലികൾ ഉപയോഗിക്കുന്നത് വിപരീത ഫലമാണ് ഉണ്ടാക്കുക.
