മലയാളികൾക്ക് ചക്ക,മാങ്ങ,തേങ്ങ,കപ്പ, ഇതെല്ലാം ഒഴിച്ചുകൂടാനാവാത്ത സാധനങ്ങളാണെന്നതിൽ തർക്കമില്ല അല്ലേ? കാർബോ ഹൈഡ്രേറ്റിന്റെ കലവറയായ കപ്പ തട്ടുകടയിലെ മുതൽ ഫൈവ് സ്റ്റാർ ഹോട്ടലിലെ വരെ മിന്നും വിഭവമാണ്,. ദഹിക്കാൻ വളരെ എളുപ്പമുള്ള വിഭവമായ കപ്പ പാർശ്വഫലങ്ങൾ അധികമില്ലാതെ ഭാരം കൂട്ടാൻ സഹായിക്കുന്ന ഒന്നാണ്. ഒരു കപ്പ് കപ്പയിൽ ഏതാണ്ട് 544 കാലറിയും 135 കാർബ്സും(കാർബോ ഹൈഡ്രേറ്റ്) ഉണ്ടത്രേ.
ബി കോംപ്ലക്സ് വൈറ്റമിനുകളും ഫോളിക് ആസിഡും അടങ്ങിയ കപ്പ, നവജാത ശിശുക്കളിൽ ന്യൂറൽ ട്യൂബ് വൈകല്യങ്ങൾ വരാനുള്ള സാധ്യത തടയും. തലച്ചോറിന്റെ വികാസത്തിനും ഡി.എൻ.എ. യുടെ രൂപപ്പെടലിനും ഇത് സഹായകമാണ്. ഗർഭിണിയെയും ഗർഭസ്ഥശിശുവിനെയുംവിളർച്ചയിൽ നിന്നു സംരക്ഷിക്കുന്നു. അത് കൊണ്ട് തന്നെ വിളർച്ചയുള്ള ഗർഭിണികൾ ഗർഭകാലത്ത് കപ്പ ഉപയോഗിക്കുന്നത് നല്ലതാണ്.
കപ്പ ഗ്ലൂട്ടൻഫ്രീ ആണ്. ഇത് സീലിയാക് ഡിസീസ്, ഗ്ലൂട്ടൻ സെൻസിറ്റിവിറ്റി, നട്ട് അലർജി ഇവയൊന്നും വരുത്തിവെയ്ക്കില്ല. കപ്പയിലെ അയൺ, കാൽസ്യം, വൈറ്റമിൻ കെ എന്നിവ എല്ലുകൾക്ക് സംരക്ഷണം നൽകുന്നു.കപ്പയിൽ ഇരുമ്പും.മകോപ്പറും ധാരാളമുണ്ട്. ഇത് അരുണരക്താണുക്കളുടെ എണ്ണം കൂട്ടാൻ സഹായിക്കുന്നു.
ഇതെല്ലാം അറിഞ്ഞോ അറിയാതയോ എന്തോ, കപ്പ നമ്മുടെ ഇഷ്ടഭക്ഷണമാണ്. കപ്പ തൊലി കളഞ്ഞാണ് നാം സാധാരണ വിഭവങ്ങൾ തയ്യാറാക്കുന്നത്. എന്നിട്ട് ആ തൊലി എന്ത് ചെയ്യും ? ദൂരെ തൊടിയിൽ കൊണ്ട് കളയും അല്ലേ? എന്നാൽ വരട്ടെ, കപ്പ തോട് കൊണ്ട് രുചികരമായ ഒരു തോരൻ ഉണ്ടാക്കാം.
തയ്യാറാക്കുന്ന വിധം
ഒരു കപ്പ് കപ്പയുടെ തോട് നന്നായി കഴുകി ചെളിയെല്ലാം നീക്കി ഒരു ഭാഗം വെള്ളയും മറ്റൊരു വശം റോസ് നിറത്തിലുമാക്കുക. ഇത് ചെറുതായി നീളത്തിൽ അരിഞ്ഞ് ആവശ്യത്തിന് വെള്ളവും ഉപ്പും ചേർത്ത് വേവിച്ചെടുക്കുക. തുടർന്ന് കപ്പ നന്നായി വെള്ളം അരിച്ചെടുത്ത് മാറ്റി വെക്കുക. കുക്കറിൽ രണ്ട് വിസിലിനും കപ്പ തോട് വേവിച്ചെടുക്കാം
തുടർന്ന് തേങ്ങ ചിരകിയത് മഞ്ഞൾപ്പൊടിയും ആറ് മുതൽ ഏഴ് വരെ ചെറിയുള്ളിയും 3 പച്ചമുളകും ചേർത്ത് ഒതുക്കിയെടുക്കുക. ചട്ടിയിൽ എണ്ണയൊഴിച്ച് കടുകും വറ്റൽമുളകും കറിവേപ്പിലയും പൊട്ടിച്ച് തേങ്ങ കൂട്ട് ചേർത്ത് പച്ചമണം മാറ്റുക.
ഇതിലേക്ക് വേവിച്ച് വെച്ച കപ്പ് ചേർത്ത് നന്നായി ഇളക്കി യോജിപ്പിക്കുക. 5-6 മിനിറ്റിന് ശേഷം തീ ഓഫ് ചെയ്ത് വിളമ്പാം. കപ്പ തോട് വേവിക്കുന്നതിനോടൊപ്പം അൽപ്പം മുതിര കൂടി ചേർത്താൽ തോരൻ കൂടുതൽ പോഷക സമ്പുഷ്ടമാകുമെന്നാണ് പണ്ടുള്ളവർ പറയുന്നത്.
