ന്യൂയോർക്ക്: വ്യത്യസ്തമായ രീതിയിൽ കഴിവുതെളിയിച്ച് ഗിന്നസ് റെക്കോർഡ് സ്വന്തമാക്കിയിരിക്കുകയാണ് അമേരിക്കൻ പൗരനായ 20-കാരൻ. യുഎസിലെ ലോവ സ്വദേശിയായ ഡാൽട്ടൺ മേയർ എന്ന ഈ മിടുക്കൻ ഒരു മിനുട്ടിനുള്ളിൽ 1,140 ക്ലാപ്പുകൾ (കരഘോഷം) അടിച്ചാണ് ഗിന്നസിലിടം പിടിച്ചത്. 1,103 ക്ലാപ്പുകൾ അടിച്ച എലി ബിഷപ്പിന്റെ റെക്കോർഡാണ് ഇതോടെ 20-കാരൻ തിരുത്തിക്കുറിച്ചത്. അതിവേഗം ക്ലാപ്പടിക്കാൻ കഴിയുന്ന ഡാൽട്ടണെ ‘സ്പീഡ് ക്ലാപ്പർ’ എന്നാണ് വിശേഷിപ്പിക്കുന്നത്.
ഗിന്നസ് നേട്ടത്തിനായി വലിയ അധ്വാനം തനിക്ക് സ്വീകരിക്കേണ്ടി വന്നിട്ടില്ലെന്നാണ് ഡാൽട്ടൺ പറയുന്നത്. അധികം പരിശീലനങ്ങൾ ചെയ്തിട്ടില്ല. വലിയ പങ്കപ്പാടുകൾ ഒന്നുമെടുക്കേണ്ടി വന്നിട്ടില്ല. നേരത്തെ ഈ വിഭാഗത്തിൽ റെക്കോർഡ് രേഖപ്പെടുത്തിയ എലി ബിഷപ്പിന്റെ അതേ തന്ത്രമാണ് പ്രയോഗിച്ചത്. കൈത്തണ്ട ഒരു പ്രത്യേക രീതിയിൽ പിടിച്ചുകൊണ്ട് കൈയ്യടിക്കുന്നതാണ് രീതിയെന്നും ഡാൽട്ടൺ പറഞ്ഞു.
തുടർന്ന് ഒരു സെക്കൻഡിൽ 19 ക്ലാപ്പുകൾ അടിച്ചാണ് ഡാൽട്ടൺ ഗിന്നസിലേക്ക് കുതിച്ചത്. ഡാൽട്ടണിന്റെ കൈയ്യടി പ്രകടനത്തിന്റെ വീഡിയോ സ്ലോ മോഷനിൽ ചിത്രീകരിച്ചാണ് ഗിന്നസ് അധികൃതർ ഇത് എണ്ണിത്തിട്ടപ്പെടുത്തിയത്. റെക്കോർഡ് പ്രകടനത്തിനായി കഴിഞ്ഞ മാർച്ച് മുതൽ തയ്യാറായിരുന്നുവെന്നും ഹാലോവീൻ കഴിയാനായി കാത്തിരിക്കുകയായിരുന്നുവെന്നും ഡാൽട്ടൺ പറഞ്ഞു.
