ഇസ്ലാമാബാദ് : ഒറ്റ രാത്രി കൊണ്ട് കോടീശ്വരനാകുക എന്നത് എല്ലാവരുടെയും ആഗ്രഹമായിരിക്കും. എന്നാൽ ശരിക്കും അങ്ങനെ സംഭവിച്ചാൽ എന്തായിരിക്കും അവസ്ഥ. പാകിസ്താനിലെ ഒരു പോലീസ് ഉദ്യോഗസ്ഥനാണ് ഒറ്റ രാത്രികൊണ്ട് കോടീശ്വരനായത്. ശമ്പളത്തോടൊപ്പം 100 മില്യൺ രൂപ( പത്ത് കോടി) ആണ് ഇയാളുടെ ബാങ്ക് അക്കൗണ്ടിലേക്ക് ഒന്നിച്ചെത്തിയത്.
കറാച്ചി ബഹദൂറാബാദ് പോലീസ് സ്റ്റേഷനിലെ അന്വേഷണ ഉദ്യോഗസ്ഥനായ ആമിർ ഗോപാംഗാണ് ഒരു രാത്രികൊണ്ട് കോടീശ്വരനായത്. എന്നാൽ ഈ പണം എവിടെ നിന്ന് വന്നതാണെന്നോ ആര് അയച്ചതാണെന്നോ വ്യക്തമല്ല. എന്തായാലും ഇത്രയും പണം ഒന്നിച്ച് കണ്ടതിന്റെ സന്തോഷത്തിലാണ് ആമിർ. അക്കൗണ്ടിൽ സാധാരണ ആയിരമോ പതിനായിരമോ രൂപ മാത്രമേ ഉണ്ടാകാറുള്ളൂ. എന്നാൽ പത്ത് കോടി രൂപ ഒന്നിച്ച് അക്കൗണ്ടിലേക്കെത്തുന്നത് ഇത് ആദ്യമായിട്ടാണെന്ന് ഞെട്ടലോടെ ഇയാൾ പറയുന്നു.
ബാങ്ക് ഉദ്യോഗസ്ഥർ വിളിച്ച് പറയുമ്പോഴാണ് ഈ വിവരം അറിയുന്നത്. തുടർന്ന് ബാങ്ക് ഇയാളുടെ അക്കൗണ്ട് ബ്ലോക്ക് ചെയ്യുകയായിരുന്നു. പണം പിൻവലിക്കാതിരിക്കാൻ എടിഎം കാർഡ് മരവിപ്പിക്കുകയും ചെയ്തു. സംഭവത്തിൽ ശക്തമായ അന്വേഷണം ആരംഭിച്ചിട്ടുണ്ട്.
Comments