ന്യൂഡൽഹി : നാഷണൽ ഹെറാൾഡ് കേസുമായി ബന്ധപ്പെട്ട കളളപ്പണം വെളുപ്പിക്കൽ കേസിൽ ഇഡിക്ക് മുന്നിൽ ഹാജരാകാനാവില്ലെന്ന് അറിയിച്ച് കോൺഗ്രസ് നേതാവ് ഡികെ ശിവകുമാർ. പാർട്ടി പ്രവർത്തകന്റെ പിറന്നാൾ ആഘോഷത്തിന് ക്ഷണിച്ചിട്ടുണ്ടെന്നും പരിപാടിയിൽ പങ്കെടുക്കണമെന്നുമാണ് വിശദീകരണം. കേസിൽ ശിവകുമാറിനെ ഇന്ന് ചോദ്യം ചെയ്യാനാണ് ഇഡി വിളിപ്പിച്ചത്.
തന്നെയും സഹോദരൻ ഡികെ സുരേഷിനെയും ചോദ്യം ചെയ്യാൻ ഇഡി വിളിപ്പിച്ചിട്ടുണ്ടെന്ന് നവംബർ 5 നാണ് ശിവകുമാർ മാദ്ധ്യമങ്ങളോട് പറഞ്ഞത്. ഹാജരാകേണ്ട കാര്യത്തിൽ ഉടൻ തീരുമാനമെടുക്കുമെന്നും അറിയിച്ചിരുന്നു. ഇതിന് പിന്നാലെയാണ് പാർട്ടി പ്രവർത്തകന്റെ പിറന്നാളിൽ പങ്കെടുക്കുകയാണെന്ന് അറിയിച്ച് ചോദ്യം ചെയ്യലിൽ നിന്ന് ഒഴിഞ്ഞുമാറിയത്.
നാഷണൽ ഹെറാൾഡിന്റെ ഉടമസ്ഥതയിലുള്ള യംഗ് ഇന്ത്യയ്ക്ക് നേരത്തെ സംഭാവന നൽകിയ തുകയുടെ വിവരങ്ങൾ വ്യക്തമാക്കാത്തതിനെ കുറിച്ച് വിശദ വിവരങ്ങൾ തേടാനാണ് അന്വേഷണ ഏജൻസി ഇരുവരെയും വിളിപ്പിച്ചത്. വിഷയത്തിൽ കോൺഗ്രസ് നേതാക്കളായ സോണിയ ഗാന്ധിയെയും രാഹുൽ ഗാന്ധിയെയും ഇഡി നേരത്തെ ചോദ്യം ചെയ്തിരുന്നു.
