മുംബൈ: ഓം റാവത്തിന്റെ സംവിധാനത്തിൽ പ്രഭാസും സെയ്ഫ് അലിഖാനും കേന്ദ്രകഥാപാത്രങ്ങളായെത്തുന്ന ആദിപുരുഷിന്റെ റീലീസ് തിയതി നീട്ടി. അണിയറ പ്രവർത്തകരാണ് ഇക്കാര്യം പുറത്തുവിട്ടത്. സമ്പൂർണ്ണ ദൃശ്യാനുഭവം നൽകുന്നതിനായാണ് സിനിമയുടെ റിലീസ് മാറ്റിവെക്കുന്നതെന്ന് സംവിധായകൻ ഓം റാവത്ത് വ്യക്തമാക്കി.
ആദിപുരുഷ് ഒരു സിനിമയല്ല. മറിച്ച് പ്രഭു ശ്രീരാമനോടുള്ള നമ്മുടെ ഭക്തിയും സംസ്‌കാരത്തോടും ചരിത്രത്തോടുമുള്ള പ്രതിബദ്ധതയുമാണ്. പ്രേക്ഷകർക്ക് ഒരു സമ്പൂർണ്ണ ദൃശ്യാനുഭവം നൽകുന്നതിനായി സിനിമയിൽ പ്രവർത്തിക്കുന്ന ടീമുകൾക്ക് കൂടുതൽ സമയം നൽകേണ്ടതുണ്ട്. ആദിപുരുഷ് 2023 ജൂൺ 16-ന് റിലീസ് ചെയ്യും. നിങ്ങളുടെ പിന്തുണയിലും സ്‌നേഹത്തിലും അനുഗ്രഹത്തിലും ഇന്ത്യയ്‌ക്ക് അഭിമാനിക്കാവുന്ന ഒരു സിനിമ നിർമ്മിക്കാൻ ഞങ്ങൾ പ്രതിജ്ഞാബദ്ധരാണ്. നിങ്ങളുടെ സ്‌നേഹവും പിന്തുണയും അനുഗ്രഹവുമാണ് ഞങ്ങളെ മുന്നോട്ട് നയിക്കുന്നത് എന്നാണ് ഓം റാവത്ത് പ്രസ്താവനയിൽ വ്യക്തമാക്കിയികിക്കുന്നത്. കുറിപ്പ് നടൻ പ്രഭാസും പങ്കുവെച്ചിട്ടുണ്ട്.
രാമായണ കഥയെ അടിസ്ഥാനമാക്കി ഓം റാവത്ത് സംവിധാനം ചെയ്യുന്ന സിനിമ 2023 ജനുവരി 12 ന് റിലീസ് ചെയ്യുമെന്നായിരുന്നു ആദ്യം അറിയിച്ചിരുന്നത്. ചിത്രത്തിന്റെ ടീസർ നേരത്തെ റിലീസ് ചെയ്തിരുന്നു. പിന്നാലെ ചിത്രത്തിന്റെ വിഎഫ്എക്‌സിനെ വിമർശിച്ച് ട്രോളുകളും പ്രത്യക്ഷപ്പെട്ടിരുന്നു.പ്രഭാസ് ശ്രീരാമനായും രാവണനായി സെയ്ഫ് അലി ഖാനും, സീതയായി കൃതി സനോനുമാണ് എത്തുന്നത്. സണ്ണി സിംഗും പ്രധാന കഥാപാത്രത്തെ അവതരിപ്പിക്കുന്നു.
