കൊല്ലം : കൊല്ലം ബൈപാസിലൂടെ വിമാനമോടുന്ന ദൃശ്യങ്ങൾ കണ്ട ഞെട്ടലിലാണ് നാട്ടുകാർ. ഒറ്റ നോട്ടത്തിൽ വിമാനം റോഡിലൂടെ ഓടുന്നുവെന്നേ തോന്നൂ. ഈ കാഴ്ച കണ്ട് നൂറുകണക്കിന് ആളുകളാണ് തടിച്ചുകൂടിയത്.
എന്നാൽ ഒന്നുകൂടി നോക്കിയപ്പോൾ മനസിലായി, അത് വിമാനം ഓടുന്നതല്ല, വിമാനം ലോറിയിൽ കയറ്റിക്കൊണ്ട് പോകുന്നതാണെന്ന്. എയർ ഇന്ത്യയുടെ ഉപയോഗശൂന്യമായ എയർ ബസ് 320 ആണ് ലോറിയിൽ കയറ്റി ബൈപാസിലെത്തിച്ചത്. ലേലത്തിൽ വാങ്ങിയ ഈ വിമാനം തിരുവനന്തപുരത്ത് നിന്ന് ഹൈദരാബാദിലേക്ക് ലോറിയിലാണ് എത്തിക്കുന്നത്.
ആന്ധ്ര സ്വദേശിയായ വ്യക്തിയാണ് വിമാനം ലേലത്തിൽ എടുത്തത്. ഇത് വലിയ കണ്ടെയ്‌നർ ലോറിയിൽ ഹൈദരാബാദിലെത്തിച്ച് ഭക്ഷണശാലയാക്കാനാണ് നീക്കം. രണ്ട് ദിവസം മുൻപാണ് വിമാനത്തിന്റെ യാത്ര ആരംഭിച്ചത്. വിമാനത്തിന്റെ ഇരുവശങ്ങളിലെയും ചിറകുകൾ ഉൾപ്പെടെ മറ്റൊരു വിമാനത്തിൽ കൊണ്ടുപോകുന്നുണ്ട്.
കഴിഞ്ഞ ദിവസം യാത്രയ്‌ക്കിടെ ബാലരാമപുരത്ത് വെച്ച് വിമാനത്തിന്റെ ചിറകിൽ ബസ് ഇടിച്ച് അപകടം ഉണ്ടായിരുന്നു. ഇത് മൂലം യാത്രയും വൈകി. രാത്രി സമയത്ത് മാത്രമാണ് ലോറി ഓടുന്നത്. 30 കിലോമീറ്റർ വേഗതയിൽ സഞ്ചരിക്കും. തുടർന്ന് അനുയോജ്യമായ സ്ഥലത്ത് നിർത്തിയിടും. ഇങ്ങനെ 20 ദിവസമെടുക്കും വിമാനം ഹൈദരാബാദിൽ എത്തിക്കാൻ.
കൊല്ലം കുരീപ്പുഴ ടോൾ പ്ലാസയുടെ സമീപം ലോറി നിർത്തിയിട്ട ദൃശ്യങ്ങളാണ് സമൂഹമാദ്ധ്യമങ്ങളിൽ ഉൾപ്പെടെ ശ്രദ്ധ നേടുന്നത്.
