ആലപ്പുഴ: ആലപ്പുഴയില് ബിവറേജ് ഔട്ട് ലെറ്റിൽ മോഷണം. 12 കുപ്പി മദ്യം മോഷ്ടിച്ചു. ഹരിപ്പാട് ആർ.കെ ജംഗ്ഷന് സമീപമുള്ള എഫ്.സി.ഐ ഗോഡൗണിൽ പ്രവർത്തിക്കുന്ന ബിവറേജ് ഔട്ട് ലൈറ്റിലാണ് മോഷണം നടന്നത്. പ്രധാന ഷട്ടറിന്റെ പൂട്ടു പൊളിച്ചാണ് മോഷ്ടാവ് അകത്തു കടന്നത്. ഞായറാഴ്ച രാവിലെ മൂന്നു മണിക്കാണ് മോഷണം.
ബിവറേജ് ഔട്ട്ലെറ്റിലെ മേശയും അലമാരയും മോഷ്ടാവ് കുത്തി തുറന്നു. എന്നാൽ, പണം ഒന്നും തന്നെ നഷ്ടപ്പെട്ടില്ല എന്നാണ് പ്രാഥമിക അന്വേഷണത്തിൽ വ്യക്തമായത്. അതേസമയം, 9430 രൂപയുടെ മദ്യമാണ് മോഷ്ടിച്ചിരിക്കുന്നത്. രാവിലെ ജീവനക്കാരൻ ഔട്ട്ലെറ്റ് വൃത്തിയാക്കാൻ എത്തിയപ്പോഴാണ് പ്രധാന ഷട്ടർ തുറന്ന നിലയിൽ കണ്ടെത്തിയത്.
സംശയം തോന്നിയ ജീവനക്കാരൻ ഉടൻ തന്നെ മാനേജരെ വിവരം അറിയിക്കുകയായിരുന്നു. മാനേജറുടെ പരാതിയെ തുടർന്ന് ഹരിപ്പാട് പോലീസും വിരലടയാളം വിദഗ്ധരും, ഡോഗ്സ്കോഡും സ്ഥലത്തെത്തി പരിശോധന നടത്തി. പോലീസ് നായ മണം പിടിച്ച് കെഎസ്ആർടിസി ബസ് സ്റ്റേഷൻ വരെ എത്തി. മദ്ധ്യവയസ്കനായ ഒരാളാണ് മോഷ്ടാവെന്നും പ്രതിയെ ഉടൻ പിടിക്കുമെന്നും പോലീസ് പറഞ്ഞു.
