ന്യൂഡൽഹി:ലോകത്താദ്യമായി മൃഗ വാക്‌സിൻ ഡ്രോണുകൾ വഴി എത്തിക്കുന്നതിന്റെ നേട്ടം സ്വന്തമാക്കി ഇന്ത്യൻ ഇമ്മ്യൂണോളജിക്കൽസ് ലിമിറ്റഡ്(ഐഐഎൽ). കേന്ദ്ര സർക്കാരും അരുണാചൽ പ്രദേശ് സർക്കാരും സംയുക്തമായാണ് ഡ്രോൺ വഴി വാക്‌സിൻ എത്തിച്ചത്. റോയിംഗിൽ നിന്ന് പഗ്ലാമിലേക്കാണ് ഡ്രോൺ പറന്നത്.
ഇത്തരത്തിൽ ഡ്രോൺ വഴി വാക്‌സിൻ എത്തിക്കാൻ കഴിയുന്നതിനാൽ വിദൂര പ്രദേശങ്ങളിൽ വേഗത്തിൽ എത്തിച്ചേരാൻ കഴിയും. കൃത്യസമയത്ത് വാക്‌സിന് ലഭ്യമാക്കുന്നത് വഴി പശുക്കളെ വിവിധ രോഗങ്ങളിൽ നിന്ന് സംരക്ഷിക്കാനാകുമെന്നും ഐഐഎൽ വിദഗ്ധർ ചൂണ്ടിക്കാട്ടി. രാജ്യത്തെ വിദൂര സ്ഥലങ്ങളിൽ വാക്സിനുകൾ ലഭ്യമാക്കുന്നതിൽ സാങ്കേതിക ഇടപെടലുണ്ടാകുമെന്ന് ഐഐഎൽ മാനേജിംഗ് ഡയറക്ടർ ഡോ.കെ ആനന്ദ് കുമാർ അറിയിച്ചു.
അരുണാചൽ പ്രദേശ് മൃഗസംരക്ഷണ വകുപ്പ് മന്ത്രി തേജ് ടാക്കി, കേന്ദ്ര മൃഗസംരക്ഷണ ജോയിന്റ് സെക്രട്ടറി ഉപമന്യ ബസു, ഐഐഎൽ പ്രതിനിധികളായ ഡി ബാനർജി, മൈനക് സെൻ എന്നിവർ പങ്കെടുത്തു.ഏഷ്യയിലെ ഏറ്റവു വലിയ വാക്‌സിൻ ഉത്പാദകരാണ് ഹൈദരാബാദ് ആസ്ഥാനമായി പ്രവർത്തിക്കുന്ന ഐഐഎൽ.
