ഇഴ ജന്തുക്കളിൽ ഏറെ അപകടകാരികളാണ് പാമ്പുകൾ. നമ്മുടെ വീടിന്റെ പരിസരങ്ങളിൽ യഥേഷ്ടം വിഹരിക്കുന്ന ഇവ പലപ്പോഴും മനുഷ്യരുടെ ജീവൻ അപായപ്പെടുത്താറുണ്ട്. പൊതുവെ മനുഷ്യവാസമുള്ള സ്ഥലം ഇഷ്ടപ്പെടാത്ത പാമ്പുകൾ പലപ്പോഴും വീടിനുളളിൽ കയറിക്കൂടുകയും നമുക്ക് വലിയ തലവേദനയാകുകയും ചെയ്യാറുണ്ട്. ശുചിമുറിക്കുളളിലും മച്ചിന്റെ പുറത്തും കട്ടിലിന് അടിയിലുമൊക്കെ ഒളിച്ചിരിക്കുന്ന പാമ്പുകൾ വീട്ടുകാർക്ക് പേടിസ്വപ്നമാകുന്ന വാർത്തകൾ ഇപ്പോൾ പതിവാണ്. ചില കാര്യങ്ങൾ ശ്രദ്ധിച്ചാൽ പാമ്പുകൾ വീട്ടിലേക്ക് കയറുന്നത് തടയാം .
വീടും പരിസരവും വൃത്തിയായി സൂക്ഷിക്കുക എന്നതാണ് പാമ്പുകളെ അകറ്റാൻ ആദ്യമായി ചെയ്യേണ്ടത്. ഭക്ഷണത്തിന്റെ അവശിഷ്ടങ്ങളോ മറ്റ് മാലിന്യങ്ങളോ വീടിന് സമീപമോ പരിസരത്തോ കുന്നുകൂട്ടി ഇടാതെയിരിക്കുക. മാലിന്യങ്ങൾ എലിയുൾപ്പെടെയുള്ള ജീവികളുടെ വാസസ്ഥലമാകും. ഇവയെ പിടിക്കാൻ പിന്നാലെ പാമ്പുകളും എത്തും. ഇത് ഒഴിവാക്കാൻ മാലിന്യങ്ങൾ കൃത്യമായി സംസ്കരിക്കണം.
പാമ്പുകളുടെ ഇഷ്ടതാവളമാണ് ഷൂസെന്ന് നേരത്തെ പറഞ്ഞുവല്ലോ. നാം വീടിന് പുറത്ത് അഴിച്ചിടുന്ന ഷൂസുകളാണ് പാമ്പുകൾ ഇത്തരത്തിൽ താവളമാക്കുന്നത്. ഇതിനുള്ളിൽ ചുരുണ്ടുകൂടിയിരിക്കുന്ന പാമ്പിനെ നാം കാണാറില്ല. പതിവ് പോലെ നാം ഇതിനുള്ളിൽ കാല് കടത്തും. ശ്രദ്ധിച്ചില്ലെങ്കിൽ പാമ്പിന്റെ കൊത്തിലാകും അത് അവസാനിക്കുക. വേദനയോടെയാണ് പാമ്പ് കൊത്തുന്നത് എന്നതുകൊണ്ടു തന്നെ ഇത് വലിയ തോതിൽ വിഷം ശരീരത്തിലേക്ക് കടക്കുന്നതിനും ജീവൻ അപകടത്തിലാകുന്നതിനും കാരണമാകും. ഇത് ഒഴിവാക്കാൻ ഷൂസ് പുറത്തിടുന്നത് ഒഴിവാക്കുക. രാത്രികാലങ്ങളിൽ തൊടിയിലേക്കും മറ്റും ഇറങ്ങുന്നത് പരമാവധി ഒഴിവാക്കുക. രാത്രി നടക്കുമ്പോൾ വടി മുന്നിൽ കുത്തി നടക്കുന്നത് പാമ്പ് കടിയേൽക്കുന്നത് തടയാൻ സഹായിക്കും.
വീടിനകത്തോ, ഭിത്തിയിലോ, പരിസരത്തോ ചെറിയ വിള്ളലുകളോ പൊത്തുകളോ ഉണ്ടെങ്കിൽ ഉടൻ അടയ്ക്കുക. ഡ്രെയ്നേജ് പൈപ്പിന്റെ അറ്റം വലകൊണ്ട് അടയ്ക്കുന്നത് പാമ്പ് വീടിനുള്ളിലേക്ക് കടക്കുന്നത് തടയും. പാമ്പിന് പുറമേ ഇങ്ങനെ ചെയ്യുന്നത് മറ്റ് ഇഴജന്തുക്കളും വീടിനുള്ളിലേക്ക് കടക്കുന്നത് തടയുന്നു.
കൂട്ടിയിട്ട കല്ല്, വിറക്, ചകിരി എന്നിവ പാമ്പുകളുടെ ഇഷ്ട വാസ സ്ഥലങ്ങളാണ്. അതിനാൽ വീടിന് സമീപം ഇവ കുന്നുകൂട്ടി ഇടാതെയിരിക്കുക. വീടിന്റെ പരിസരം പുല്ല് വളർന്ന് കാടുപിടിച്ചു കിടക്കുന്ന അവസ്ഥയും ഒഴിവാക്കാൻ പ്രത്യേകം ശ്രദ്ധിക്കേണ്ടതാണ്. ഇതിന് പുറമേ അടിച്ചു കൂട്ടിയ ശേഷം കരിയിലകളും ചവറും കൂട്ടിയിടുന്നതും ഒഴിവാക്കുക.
ചുമരിലും മേൽക്കൂരയിലുമായി പടർന്ന് പന്തലിച്ച് നിൽക്കുന്ന നിൽക്കുന്ന വള്ളിച്ചെടികൾ മിക്ക വീടുകളിലെയും നിത്യകാഴ്ചയാണ്. എന്നാൽ അമിതമായി വള്ളിച്ചെടികൾ തൂക്കുന്നത് ഒഴിവാക്കുക. ഇത് പാമ്പുകൾ വീടിനുള്ളിലേക്ക് കയറുന്നതിന് കാരണമാകും. ചെടികളുടെ വള്ളികളിലൂടെ അരിച്ച് പാമ്പുകൾ വീടിനുള്ളിലേക്ക് കടന്നേക്കാം.
