ശൂ..ശൂ.. ഉറങ്ങുവാണോ? കിടക്കുന്ന പട്ടിയെ കുത്തിപ്പൊക്കി കാണ്ടാമൃഗം; പിന്നീട് സംഭവിച്ചത്..

കാണ്ടാമൃഗമെന്ന് പറയുമ്പോൾ പേടിപ്പെടുത്തുന്ന ഭീമാകരമായ രൂപമാണ് ഏതൊരാളുടെയും മനസിൽ വരിക. എന്ത് പറഞ്ഞാലും കൂസലില്ലാതെ നിൽക്കുന്നവരെയും ഭയമില്ലാത്തവരെയും കണ്ടാമൃഗത്തിന്റെ തൊലിക്കട്ടിയുണ്ടെന്ന് പറഞ്ഞ് വിശേഷിപ്പിക്കുകയും ചെയ്യാറുണ്ട്. അതിനിടെ രസകരമായ പ്രവൃത്തിമൂലം സോഷ്യൽ മീഡിയയിൽ താരമായിരിക്കുകയാണ് ഒരു കാണ്ടാമൃഗം. ഇത്രമാത്രം ‘ക്യൂട്ട്’ ആയിരുന്നോ കണ്ടാമൃഗങ്ങൾ എന്നാണ് വൈറൽ വീഡിയോ കണ്ടവരുടെ പ്രതികരണം.

വീഡിയോയിൽ താരമായ നായ റോഡരികിൽ നല്ല മയക്കത്തിലാണ്. ആഴത്തിലുള്ള ഉറക്കമായതിനാൽ ചുറ്റും സംഭവിക്കുന്നതൊന്നും നായ അറിയുന്നില്ല. ഇതുകണ്ട് അടുത്തേക്ക് വന്ന കാണ്ടാമൃഗം പതുക്കെ വന്ന് നായയെ തട്ടിയുണർത്തി. കണ്ണുതുറന്ന നായ ഇനി ഞെട്ടാൻ ബാക്കിയൊന്നുമില്ല. ഇത്രയും വലിയ മൃഗം തന്റെ അടുത്ത് വന്ന് നിൽക്കുന്നത് പെട്ടെന്ന് കണ്ടപ്പോൾ നായ വിരണ്ടുപോയി. ഇതോടെ കുരച്ചുകൊണ്ട് ചാടിയെഴുന്നേറ്റു. എന്നാൽ അപ്രതീക്ഷിതമായി ഒരു കുര കേട്ടതോടെ ഭീമനായ കാണ്ടാമൃഗത്തിനും അടിപതറി. നായയുടെ കുരയിൽ കണ്ടാമൃഗം ഞെട്ടുന്നതും ദൃശ്യങ്ങളിൽ കാണാം..

If you wanted any proof that the Rhinos are really gentle 😊😊 pic.twitter.com/6WhK5VMyqr

— Susanta Nanda (@susantananda3) November 15, 2022

കണ്ടാമൃഗങ്ങൾ യഥാർത്ഥത്തിൽ തികച്ചും സൗമ്യരാണെന്നുള്ളതിന് മറ്റെന്തെങ്കിലും തെളിവ് വേണോയെന്ന അടിക്കുറിപ്പോടെ ഇന്ത്യൻ ഫോറസ്റ്റ് ഓഫീസറായ സുശാന്ത നന്ദയാണ് ദൃശ്യങ്ങൾ ട്വിറ്ററിൽ പങ്കുവെച്ചത്. നിരവധി പേർ ഈ വീഡിയോ റീട്വീറ്റ് ചെയ്തു. ദൃശ്യങ്ങൾ വൈറലായതോടെ കാണ്ടാമൃഗത്തിന്റെ സൗമ്യതയെ പുകഴ്‌ത്തി നിരവധി പേരാണ് പ്രതികരണമറിയിക്കുന്നത്.