ന്യൂഡൽഹി: രാഹുൽ ഗാന്ധി നയിക്കുന്ന ഭാരത് ജോഡോ യാത്രയെ പുകഴ്‌ത്തി സിപിഎം ദേശീയ നേതൃത്വം. യാത്രയ്‌ക്ക് തെക്കേ ഇന്ത്യയിൽ മികച്ച പ്രതികരണമാണ് ലഭിക്കുന്നതെന്നാണ് സിപിഎം കേന്ദ്രകമ്മിറ്റി റിപ്പോർട്ടിൽ പറയുന്നത്. ഒക്ടോബർ 29 മുതൽ 31 വരെ നടന്ന കേന്ദ്രകമ്മിറ്റി യോഗത്തിലെ ചർച്ചയിൽ അംഗീകരിച്ച രാഷ്‌ട്രീയരേഖയിലാണ് ഭാരത് ജോഡോ യാത്രയെ പുകഴ്‌ത്തുന്നത്. രാഹുലിന്റെ യാത്ര കോൺഗ്രസിനെ ഒന്നിപ്പിക്കാനും ജനബന്ധം വീണ്ടെടുക്കാനുള്ള ശ്രമമായി കാണുന്നതായി സിപിഎം പറയുന്നു.
രാഷ്‌ട്രീയരേഖയിൽ ‘മതേതര പാർട്ടികൾ; സമീപകാല സംഭവവികാസങ്ങൾ’ എന്ന തലക്കെട്ടിൽ പരാമർശിച്ചിട്ടുള്ള ഉള്ളടക്കത്തിലാണ് രാഹുലിന്റെ ജോഡോ യാത്രയെ പ്രശംസിക്കുന്നത്. രാഹുൽ ഗാന്ധിയുടെ നേതൃത്വത്തിൽ കന്യാകുമാരി മുതൽ ശ്രീനഗർ വരെ നൂറ്റമ്പത് ദിവസമായി നടത്തുന്ന ഭാരത് ജോഡോ യാത്രക്ക് തെക്കെ ഇന്ത്യയിൽ നിന്നും മികച്ച പ്രതികരണമാണ് ലഭിച്ചത്. ബിജെപിക്ക് കൂടുതൽ സ്വാധീനമുള്ള പ്രദേശങ്ങളിലെ ജനങ്ങളിൽ നിന്നും യാത്രക്ക് ഏത് രീതിയിലുള്ള പ്രതികരണമാകും ലഭിക്കുകയെന്നതാണ് ഉറ്റുനോക്കുന്നത്. ആഭ്യന്തര പ്രശ്‌നങ്ങളെ തുടർന്ന് കോൺഗ്രസിൽ നിന്നും പല നേതാക്കളും ബിജെപിയിലേക്ക് ചേക്കേറുന്ന ഈ സമയത്ത് പാർട്ടിയെ ഒന്നിപ്പിക്കാനുള്ള ശ്രമമായി ഈ യാത്രയെ കാണുന്നുവെന്നും റിപ്പോർട്ടിൽ പറയുന്നു.
ഭാരത് ജോഡോ യാത്രയെ കേരളത്തിലെ സിപിഎം നേതാക്കൾ വിമർശിച്ചിരുന്നു. ഇത് തള്ളിക്കൊണ്ടാണ് കേന്ദ്രത്തിന്റെ റിപ്പോർട്ട്. കണ്ടെയ്‌നർ യാത്രയാണെന്നായിരുന്നു സെക്രട്ടേറിയറ്റംഗം എം.സ്വരാജിന്റെ പരിഹാസം. കേരളത്തിൽ 18 ദിവസം യുപിയിൽ രണ്ട് ദിവസം എന്ന പരിഹാസവും സിപിഎം കോൺഗ്രസിന്റെ ജോഡോ യാത്രയ്‌ക്ക് നേരെ ഉയർത്തിയിരുന്നു.
