പുല്ലിന്റെ വില പോലും തന്നില്ല എന്നൊക്കെ പറയുന്നത് കേട്ടിട്ടില്ലേ. വിലയില്ലാത്ത ഒന്നായാണ് പലരും പുല്ലിനെ കാണുന്നത്. എന്നാൽ കാര്യങ്ങൾ അങ്ങനെ അല്ലെന്ന് അറിഞ്ഞോളൂ. നമ്മുടെ നാട്ടിൽ സർവ്വസാധാരണമായി കാണുന്ന പുല്ലുവർഗങ്ങളിൽ ഒന്നാണ് മുത്തങ്ങ പുല്ല്. നിരവധി ഗുണങ്ങൾ ഉള്ള ഇത് ആയുർവേദത്തിൽ പല ഔഷധങ്ങളിലും ഇത് ഉപയോഗിക്കുന്നു.
മുത്തങ്ങ കോര എന്നും ഈ ചെടി അറിയപ്പെടുന്നു. പെരുംകോര, ചെറുകോര എന്നിങ്ങനെ രണ്ടു തരത്തിലുള്ള മുത്തങ്ങ ഉണ്ട്. കിഴങ്ങ് ഉള്ളതാണ് ചെറുകോര .ഇതാണ് ഔഷധങ്ങളിൽ ചേർക്കുന്നത്. പെരുംകോരക്ക് കിഴങ്ങ് ഉണ്ടാകാറില്ല. പെരുംകോരകൊണ്ട് നെയ്യുന്ന പായയാണ് കോരപ്പായ് അഥവാ പുൽപായ് എന്നറിയപ്പെടുന്നത്.
യൗവനം നിലനിർത്താൻ സഹായിക്കുന്ന ഔഷധമാണ് മുത്തങ്ങ. വയറിളക്കം മാറുന്നതിനും മുലപ്പാൽ വർദ്ധിക്കുന്നതിനും നാട്ടുചികിത്സയിൽ മുത്തങ്ങ ഇന്നും ഉപയോഗിച്ചുവരുന്നു. ചെറുകിഴങ്ങിൽ ധാരാളം ജലം അടങ്ങിയിട്ടുണ്ട്. ഇത് ദാഹശമനത്തിന് ഉത്തമമാണ്. കുട്ടികളിലുണ്ടാകുന്ന ദഹനക്ഷയം, വയറുവേദന, ഗ്രഹണി, അതിസാരം എന്നിവയ്ക്ക് പ്രതിവിധിയായി ഉപയോഗിച്ചുവരുന്നു. മുത്തങ്ങയുടെ ആരും മൊരിയും കളഞ്ഞ് വൃത്തിയാക്കി മോരിൽ തിളപ്പിച്ചു കൊടുക്കാം. കഴുകി വൃത്തിയാക്കി ഉണക്കിപ്പൊടിച്ച് തേൻ ചേർത്ത് കൊടുക്കുകയും പതിവുണ്ട്.
15-20 ഗ്രാം മുത്തങ്ങ ഒരു ഗ്ലാസ്സ് പാലും സമം വെള്ളവും ചേർത്ത് തിളപ്പിച്ച് പതിവായി കുറുക്കിക്കൊടുത്താൽ കുട്ടികളുടെ ദഹനക്കേട്, രുചിക്കുറവ്, അതിസാരം എന്നിവ സുഖപ്പെടും. മുത്തങ്ങ സേവിക്കുന്നതും അരച്ച് സ്തനത്തിൽ ലേപനം ചെയ്യുന്നതും മുലപ്പാൽ വർദ്ധിപ്പിക്കും. മുത്തങ്ങക്കിഴങ്ങ് ഉണക്കിപ്പൊടിച്ച് തേനിൽ ചാലിച്ചുകഴിച്ചാൽ വയറുകടിയും വയറിളക്കവും മാറും. മുത്തങ്ങ മോരിൽ അരച്ചു കുഴമ്പാക്കി പുരട്ടിയാൽ കഴുത്തിലുണ്ടാകുന്ന കുരുക്കൾക്ക് ശമനമുണ്ടാകും.
