ദോഹ: ഖത്തർ ലോകകപ്പിന് തുടക്കം കുറിക്കാൻ നിമിഷങ്ങൾ മാത്രം അവശേഷിക്കെ ആരാധക ലോകം ഫുട്ബോൾ ലഹരിയിൽ. കേരളത്തിൽ നിന്നും ഉൾപ്പെടെ നിരവധി ആരാധകരാണ് തങ്ങളുടെ ഇഷ്ട ടീമുകളുടെ മത്സരങ്ങൾ നേരിട്ട് കാണാൻ ഖത്തറിൽ എത്തിയിരിക്കുന്നത്. ഖത്തറിൽ പോയി നേരിട്ട് മത്സരങ്ങൾ കാണാൻ സാധിക്കാത്തവർക്ക് ടിവിയും ലാപ്ടോപ്പും മൊബൈൽ ഫോണും തന്നെയാണ് ആശ്രയം.
ഇന്ത്യയിൽ മത്സരങ്ങളുടെ സംപ്രേഷണാവകാശം സ്വന്തമാക്കിയിരിക്കുന്നത് റിലയൻസ് ഇൻഡസ്ട്രീസിന്റെ ഉടമസ്ഥതയിലുള്ള വയാകോം 18 ആണ്. വയാകോം 18ന്റെ സ്പോർട്സ് ചാനലായ സ്പോർട്സ് 18 ചാനലിൽ മത്സരങ്ങൾ കാണാം. പ്രമുഖ കേബിൾ, ഡിടിഎച്ച് പ്ലാറ്റ്ഫോമുകളിൽ ചാനൽ ലഭ്യമാണ്.
മത്സരങ്ങളുടെ ലൈവ് സ്ട്രീമിംഗ് റിലയൻസ് ഇൻഡസ്ട്രീസിന്റെ തന്നെ ഉടമസ്ഥതയിലുള്ള ജിയോ സിനിമ ആപ്പിൽ ലഭ്യമാകും. ജിയോ സിം ഇല്ലാത്തവർക്ക് ജിയോ സിനിമ ലഭ്യമാകുമോ എന്ന ആശങ്ക ആരാധകർക്ക് വേണ്ട. ഏത് സിം ഉപയോഗിക്കുന്നവർക്കും ജിയോ സിനിമ ആപ്പ് ഡൗൺലോഡ് ചെയ്ത് മത്സരങ്ങൾ കാണാൻ സാധിക്കും. മറ്റ് ഒടിടി/ സ്ട്രീമിംഗ് പ്ലാറ്റ്ഫോമുകളിൽ നിന്നും വ്യത്യസ്തമായി, സൗജന്യമായാണ് ജിയോ സിനിമ ആപ്പുകളിലെ കണ്ടന്റ് ഉപഭോക്താക്കൾക്ക് ലഭ്യമാകുക. സ്മാർട്ട് ടിവികളിലും ജിയോ സിനിമ ആപ്പ് ഉപയോഗിച്ച് മത്സരങ്ങൾ കാണാൻ സാധിക്കും.
ഇന്ത്യൻ സമയം രാത്രി 9.30നാണ് ഫിഫ ലോകകപ്പ് ഉദ്ഘാടന മത്സരത്തിൽ ഖത്തറും ഇക്വഡോറും ഏറ്റുമുട്ടുന്നത്. ഇന്ത്യൻ സമയം രാത്രി 12.30, വൈകുന്നേരം 3.30, 6.30, രാത്രി 9.30 എന്നിങ്ങനെയാണ് മത്സരങ്ങളുടെ സമയം.
