ന്യൂഡൽഹി: ഡൽഹിയിലെ ശ്രദ്ധ വാക്കർ കൊലപാതകത്തിൽ ഞെട്ടിത്തരിച്ചിരിക്കുകയാണ് രാജ്യം മുഴുവൻ. 27-കാരിയായ പങ്കാളിയെ വെട്ടി കൊലപ്പെടുത്തി മൃതദേഹം കഷ്ണങ്ങളാക്കി മൂന്നാഴ്ചയോളം ഫ്രിഡ്ജിൽ സൂക്ഷിക്കുകയും പിന്നീട് ദിവസങ്ങളെടുത്ത് ഡൽഹിയുടെ വിവിധ സ്ഥലങ്ങളിൽ സംസ്കരിച്ചെന്നുമുള്ള പേടിപ്പെടുത്തുന്നതും ഞെട്ടിക്കുന്നതുമായ വാർത്തയാണ് പുറത്തുവന്നത്. ഇതിന് പിന്നാലെ ഇൻസ്റ്റഗ്രാമിൽ സംഭവത്തിന്റെ റീലുമായി യുവാവ്. സോഷ്യൽമീഡിയ ഇൻഫ്ളുവെൻസറായ ആരീഷ് ഗുപ്തയെന്ന യുവാവാണ് ഇത്തരത്തിൽ അക്രമ സ്വഭാവമുള്ള വീഡിയോ അപ്ലോഡ് ചെയ്തത്.
റീലിന് പിന്നാലെ നിരവധി പേരാണ് കമന്റുമായെത്തിയത്. തികച്ചും നിർവികാരമായ പ്രവൃത്തിയാണിതെന്നും ജനങ്ങളെ ആക്രമണങ്ങൾക്ക് പ്രേരിപ്പിക്കുകയാണെന്നുമുള്ള കമന്റുകൾ വന്നിട്ടുണ്ട്. കമിതാക്കൾക്കിടയിൽ എന്താണ് സംഭവിച്ചതെന്നതിന്റെ ദൃശ്യാവിഷ്കാരമാണ് ഗുപ്ത ചെയ്തത്. വീഡിയോയിൽ സിനിമാ ഗാനവും ചേർത്തിട്ടുണ്ട്. സമൂഹത്തിനെ നല്ല രീതിയിൽ സ്വാധീനിക്കുന്നതിനാണ് സോഷ്യൽ മീഡിയ ഇൻഫ്ളുവൻസർമാർ എന്നിരിക്കെയാണ് ഇ്ത്തരത്തിൽ റീൽ വീഡിയോ.
Shraddha murder case is now influencer reel topic.
Trigger warning: Violence, murder, abuse. pic.twitter.com/SlUiPgDQQb
— Nirwa Mehta (@nirwamehta) November 18, 2022
കൊലപാതകം വരെ റീൽ വിഷയമായി മാറിയെന്നും അക്രമവും കൊലപാതകവും ചിത്രീകരിക്കുന്ന വീഡിയോയാണെന്നും അടിക്കുറിപ്പിൽ ഇൻസ്റ്റഗ്രാം ഉപയോക്താവ് റീൽ വീഡിയോ പങ്കുവെച്ചിട്ടുണ്ട്. വീഡിയോയുടെ അവസാനത്തിൽ പൊതു അവബോധം പ്രചരിപ്പിക്കാനാണ് വീഡിയോയുടെ ഉദ്ദേശമെന്ന് പറയുന്നുണ്ടെങ്കിലും ഉപയോക്താക്കൾ ഗുപ്തയെ രൂക്ഷമായി വിമർശിച്ചു. ഇൻസ്റ്റാഗ്രാമിൽ ഏകദേശം 179,000 ഫോളോവേഴ്സും യൂട്യൂബിൽ 300,000-ലധികം വരിക്കാരുമുള്ള ഇൻഫ്ളുവെൻസറാണ് ആരുഷ് ഗുപ്ത.
