ശരീര സൗന്ദര്യം പോലെ തന്നെ ഏറെ പ്രാധാന്യമർഹിക്കുന്ന ഒന്നാണ് ചുണ്ടുകളുടെ സൗന്ദര്യസംരക്ഷണവും. ഒരു പക്ഷേ എല്ലാവരും ഒരു പോലെ ആഗ്രഹിക്കുന്ന ഒന്നാകും നല്ല ചുവന്ന തുടുത്ത നിറമുള്ള ചുണ്ടുകൾ. പലരും ചുണ്ടുകൾക്ക് നിറം ലഭിക്കുന്നതിനായി കടകളിൽ നിന്നും വിവിധതരം ഉത്പന്നങ്ങൾ ഉപയോഗിക്കുന്നവരുമാണ്. എന്നാൽ ഇവയുടെ ഉപയോഗം നിർത്തുന്നതോടെ കൂടുതൽ കറുപ്പ് നിറമാകാനും സാദ്ധ്യതയുണ്ട്. പുകവലിക്കുന്നവരിലും ചുണ്ടുകൾക്ക് നിറ വ്യത്യാസം അനുഭവപ്പെടാം. എന്നാൽ ഇതിനെല്ലാം ഉപരിയായി മറ്റ് ചില കാരണങ്ങൾ കൂടിയുണ്ട് ചുണ്ടുകൾ കറുക്കുന്നതിന്.
* ലിപ്സ്റ്റിക്കുകൾ, ലിപ് ഗ്ലോസുകൾ, ലിപ് പ്ലമ്പറുകൾ എന്നിവയുണ്ടാക്കുന്ന അലർജി ചുണ്ടുകളുടെ കറുപ്പ് നിറത്തിന് കാരണമാകും. ഉപയോഗിക്കുന്ന ഉൽപ്പന്നങ്ങൾ ചർമ്മത്തിന് നന്നായി യോജിക്കുന്നുവെന്ന് ഉറപ്പാക്കിയ ശേഷം മാത്രമേ ഉൽപ്പന്നങ്ങൾ തിരഞ്ഞെടുക്കാൻ പാടുള്ളൂ.
* ഇടയ്ക്കിടെ ചുണ്ടുകൾ നക്കുന്ന സ്വഭാവമുള്ളവരുടെ ചുണ്ടുകൾ കറുപ്പ് നിറമാകും.ആവർത്തിച്ച് ഇത്തരത്തിൽ ചെയ്യുന്നത് വഴി ചുണ്ടിൽ ചൊറിച്ചിലുണ്ടാകാനും സാദ്ധ്യതയുണ്ട്.
* മുഖത്തിന് സൂര്യപ്രകാശമേൽക്കുന്നത് പോലെ ചുണ്ടുകൾക്കും സൂര്യപ്രകാശമേൽക്കും. അതുവഴി ചുണ്ടുകൾ വരണ്ടതാകാനും കറുത്തതാകാനും സാദ്ധ്യതയുണ്ട്.
*സിൽവർ -കോട്ടഡ് മൗത്ത് ഫ്രഷ്നറുകൾ ഉപയോഗിക്കുന്നതും ചുണ്ടുകളുടെ നിറമാറ്റത്തിന് കാരണമാകും.
* പല്ല് തേക്കാനുപയോഗിക്കുന്ന പേസ്റ്റിനും ചുണ്ടിന് നിറം നൽകുന്നതിൽ പങ്കുണ്ട്. പേസ്റ്റിൽ അടങ്ങിയിരിക്കുന്ന ഉത്പന്നങ്ങൾ പരിശോധിച്ച ശേഷം മാത്രമേ ഉപയോഗിക്കാവൂ.
* പുകവലി കാലക്രമേണ ചുണ്ടുകളുടെ നിറമാറ്റത്തിന് കാരണമാകും.
* ജനിതകപരമായ മാറ്റങ്ങൾ കൊണ്ടും ചുണ്ടുകൾക്ക് നിറവ്യത്യാസം സംഭവിക്കാം.
എങ്ങനെ നിറമാറ്റം തടയാം?
* ചുണ്ടുകളിൽ ജലാംശം നിലനിർത്തുകയാണ് ആദ്യം ചെയ്യേണ്ടത്. ഇതിനായി നന്നായി വെള്ളം കുടിക്കുകയും ദിവസത്തിൽ പല തവണ ലിപ് ബാം തേക്കുകയും ചെയ്യാവുന്നതാണ്. ലിപ് ബാം ചുണ്ടുകൾ വരണ്ട് പൊട്ടുന്നത് തടയും.
* സുഗന്ധമില്ലാത്ത ലിപ് ബാം ഉപയോഗിക്കുന്നതാണ് നല്ലത്. നെയ്യും ബദാം എണ്ണയും മികച്ച പ്രകൃതി ദത്ത ലിപ് ബാമാണ്.
* ലിപ്സ്റ്റിക്കുകൽ തിരഞ്ഞെടുക്കുമ്പോഴും മണമില്ലാത്തത് തിരഞ്ഞെടുക്കാൻ പ്രത്യേകം ശ്രദ്ധിക്കാം
