വെല്ലിംഗ്ടൺ: ആഹാരം കഴിച്ച പാത്രങ്ങൾ വൃത്തിയാക്കാൻ ആവശ്യപ്പെട്ടതിനെ തുടർന്ന് ജോലി രാജിവെച്ച് പ്രമുഖ ഓൺലൈൻ ഫുഡ് ഡെലിവറി കമ്പനിയായ മക്ഡൊണാൾഡ്സിന്റെ ജീവനക്കാരൻ.പാചകത്തിന് ഉപയോഗിക്കുന്ന പാത്രങ്ങളും ആഹാരം കഴിച്ച പാത്രങ്ങളും കഴുകി വൃത്തിയാക്കാനാണ് ജോലി സമയത്ത് ജീവനക്കാരന് നിർദേശം നൽകിയത്. തുടർന്നാണ് ജോലി ഉപേക്ഷിക്കുന്നതെന്ന് ജിവനക്കാരൻ വ്യക്തമാക്കി. വീഡിയോയിലൂടെയാണ് ജീവനക്കാരൻ രാജി അറിയിച്ചത്.
ടിക് ടോക്ക് ആപ്പ് വഴിയാണ് ഇയാൾ രാജി സന്നദ്ധത അറിയിച്ചത്. 26 സെക്കൻഡുള്ള വീഡിയോ വഴിയാണ് രാജി അറിയിച്ചത്. ‘ഞാൻ ഇത് വൃത്തിയാക്കുന്നില്ല’ എന്ന് നിരവധി തവണ ഇയാൾ പറയുന്നുണ്ട്. ഇവിടം നരകത്തിന് തുല്യമാണെന്നും അതിനാൽ ഇനി തുടർന്ന് പോകുന്നതിൽ ബുദ്ധിമുട്ടുണ്ടെന്നുമാണ് അയാൾ വീഡിയോയിൽ പറയുന്നത്. തുടർന്ന് മാനേജറിന് രാജി സമർപ്പിച്ചു. എന്നാൽ അറിയിപ്പിൽ രോഷാകുലനായ മാനേജർ ജീവനക്കാരനോട് തിരികെ എത്താനും നിർദേശിക്കുന്നത് വീഡിയോയിൽ വ്യക്തമാണ്. സഹപ്രവർത്തകരും ജീവനക്കാരനോട് തുടരാൻ പറഞ്ഞെങ്കിലും കമ്പനി വിടുന്നതിൽ ജീവനക്കാരൻ ഉറച്ചുനിൽക്കുകയായിരുന്നു.
സംഭവത്തിന്റെ വീഡിയോ ദൃശ്യങ്ങൾ സമൂഹമാദ്ധ്യമങ്ങളിൽ വൈറലായി. ഏകദേശം 2.9 ദശലക്ഷം ആളുകളാണ് വീഡിയോ ഇതിനോടകം കണ്ടത്. ഇത് ഞാൻ ആണെന്ന് ഒരു നിമിഷം തോന്നിയെന്നാണ് ഒരു ജീവനക്കാരൻ കമന്റ് ചെയ്തത്. എന്നാൽ മറ്റൊരാൾ ജീവനക്കാരനെ എതിർത്തു. പാത്രം കഴുകുകയെന്നത് അത്ര മോശം ജോലി അല്ലെന്നും കുറച്ച് സമയത്തിനുള്ളിൽ ചെയ്യാവുന്നതുമാണെന്നും ഒരാൾ കമന്റ് ചെയ്തു.
മക്ഡൊണാൾഡ്സിന്റെ ജീവനക്കാർ ഇത്തരത്തിൽ ജോലി ഉപേക്ഷിക്കുന്നത് ഇതാദ്യമല്ല. ഇതിന് മുൻപും ഇത്തരം സംഭവങ്ങളുണ്ടായിട്ടുണ്ട്. കഴിഞ്ഞ വർഷം ജീവനക്കാർ കൂട്ടത്തോടെ ഇറങ്ങി പോയിരുന്നു. എല്ലാവരും പിരിഞ്ഞു പോയതിനാൽ കമ്പനി അടച്ചിടുന്നുവെന്ന അടിക്കുറിപ്പോടെ കമ്പനി ചിത്രം പങ്കുവെച്ചിരുന്നു.
