പൂനെ: നടൻ വിക്രം ഗോഖലെ അന്തരിച്ചുവെന്ന തരത്തിൽ ഉയരുന്ന വാർത്തകൾ നിഷേധിച്ച് കുടുംബം. അദ്ദേഹം ഗുരുതരാവസ്ഥയിൽ തുടരുകയാണെന്ന് കഴിഞ്ഞ ദിവസം വാർത്താ ഏജൻസിയായ എഎൻഐ റിപ്പോർട്ട് ചെയ്തിരുന്നു. ഇതിനു പിന്നാലെയാണ് ഗോഖലെ മരിച്ചുവെന്ന തരത്തിൽ അഭ്യൂഹങ്ങൾ ഉയർന്നത്. ഇക്കാര്യം നിഷേധിച്ച് ഗോഖലെയുടെ മകളാണ് രംഗത്തെത്തിയത്.
വിക്രം ഗോഖലെയുടെ ആരോഗ്യനില അതീവഗുരുതരമാണെന്നും രക്ഷാ ഉപകരണങ്ങളുടെ സഹായത്തോടെയാണ് ജീവൻ നിലനിർത്തുന്നതെന്നും മകൾ പറഞ്ഞു. ഇപ്പോഴും ജീവനോടെയുണ്ടെന്നും എല്ലാവരും പ്രാർത്ഥിക്കണമെന്നും അവർ കൂട്ടിച്ചേർത്തു. പൂനെയിലെ ദീനനാഥ് മങ്കേഷ്കർ ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിൽ കഴിയുകയാണ് വിക്രം ഗോഖലെ. കഴിഞ്ഞ 15 ദിവസമായി അദ്ദേഹം ആശുപത്രിയിലുണ്ടെന്നാണ് വിവരം.
ഹിന്ദി, മറാത്തി ചിത്രങ്ങളിലൂടെ എത്തി സിനിമാ പ്രേമികളുടെ മനസിൽ ഇടം പിടിച്ച നടനായിരുന്നു ഗോഖലെ. അമിതാഭ് ബച്ചന്റെ അഗ്നിപഥ്, സഞ്ജയ് ലീല ബൻസാലി ചിത്രം ഹം ദിൽ ദേ ചുകേ സനം എന്നീ ചിത്രങ്ങൾ അദ്ദേഹത്തിന് ഏറെ പ്രേക്ഷകപ്രീതി നേടിതന്നു. നിരവധി ടെലിവിഷൻ ഷോകളിലൂടെയും അദ്ദേഹം കാഴ്ചക്കാർക്ക് മുന്നിൽ എത്തിയിരുന്നു. ഏകദേശം 40 വർഷത്തോളം നീണ്ടതായിരുന്നു ഗോഖലെയുടെ അഭിനയ ജീവിതം.
