മോഹൻലാലിന്റെ എക്കാലത്തെയും വലിയ ഹിറ്റുകളിലൊന്നാണ് ഭദ്രൻ സംവിധാനം ചെയ്ത ‘സ്ഫടികം’. 1995 മാര്‍ച്ച് 30-ന് തിയറ്ററുകളിലെത്തിയ ചിത്രം ഇന്നും മലയാളി മനസ്സുകളിൽ നിറഞ്ഞു നിൽക്കുകയാണ്. ‘സ്ഫടികം’ എന്ന തന്റെ ചിത്രം പുതിയ കാലത്തിന്റെ എല്ലാ സാങ്കേതിക വിദ്യകളോടെയും വീണ്ടും റിലീസ് ചെയ്യുകയാണ് എന്ന് ഒദ്യോഗികമായി മോഹൻലാൽ അറിയിച്ചതോടെ സമൂഹമാദ്ധ്യമങ്ങളിൽ സ്ഫടികവും ആടു തോമയും വീണ്ടും നിറഞ്ഞു നിൽക്കുകയാണ്. ഇപ്പോഴിതാ സിനിമയിലെ രണ്ട് പ്രധാന കഥാപാത്രങ്ങളുടെ ചിത്രമാണ് സോഷ്യൽ മീഡിയയിൽ തരംഗമാകുന്നത്. എസ്ഐ കുറ്റിക്കാടനും തൊരപ്പൻ ബാസ്റ്റിനും 28 വർഷങ്ങൾക്ക് ശേഷം ഒന്നിച്ചിരിക്കുകയാണ്. സ്ഫടികം അണിയറ പ്രവർത്തകർ സംഘടിപ്പിച്ച പ്രസ്സ് മീറ്റിലാണ് ഈ സംഗമം.
സ്ഫടികത്തിൽ ആടുതോമയുടെ പ്രധാന ശത്രുവായ എസ്ഐ കുറ്റിക്കാടനായി വേഷമിട്ട സ്ഫടികം ജോർജ്ജും ആടുതോമയെ കൊല്ലാൻ ജയിലിൽ നിന്നും ഇറങ്ങിയ തൊരപ്പൻ ബാസ്റ്റിനായി വേഷമിട്ട പി.എൻ.സണ്ണിയും അതേ വേഷത്തിലാണ് സ്ഫടികം പ്രസ്സ് മീറ്റിൽ എത്തിയത്. ഇതിന്റെ ചിത്രങ്ങളാണ് സമൂഹമാദ്ധ്യമങ്ങളിൽ വൈറലാകുന്നത്. ഇരുവരും സ്ഫടികം എന്ന സിനിമയുടെ ഭാഗമായത് എങ്ങനെയാണെന്ന് സംവിധായകൻ ഭദ്രൻ പ്രസ്സ് മീറ്റിൽ പറഞ്ഞു. ഒപ്പം, ചിത്രത്തിലെ തന്റെ ഡയലോഗ് വീണ്ടും ഓർത്തെടുത്ത് സ്ഫടികം ജോർജ്ജ് അവതരിപ്പിച്ചു.
2023 ഫെബ്രുവരി 9-ന് ലോകമെമ്പാടുമുള്ള തിയറ്ററുകളിൽ സ്ഫടികം റിലീസ് ചെയ്യും. ഡോൾബി 4k അറ്റ്‌മോസിൽ കൂടുതൽ മികവോടെയാണ് ചിത്രം റി -റിലീസ് ചെയ്യുന്നത്. മോഹൻലാൽ തന്നെയാണ് ഇക്കാര്യം ആദ്യം ഫേസ്ബുക്കിലൂടെ അറിയിച്ചത്. “എക്കാലവും നിങ്ങൾ ഹൃദയത്തോട് ചേർത്തുവച്ച എന്റെ ആടുതോമ നിങ്ങൾ ആഗ്രഹിച്ചത് പോലെ പുതിയ കാലത്തിന്റെ എല്ലാ സാങ്കേതിക മികവോടെയും വീണ്ടും റിലീസാവുന്നു.
ലോകം എമ്പാടുമുള്ള തിയേറ്റുകളിൽ 2023 ഫെബ്രുവരി മാസം 9 – ന് സ്ഫടികം 4k Atmos എത്തുന്നു. ഓർക്കുക. 28 വർഷങ്ങൾക്കു മുമ്പ് ഇതുപോലൊരു വ്യാഴാഴ്ചയാണ് ആടുതോമയെ നിങ്ങൾ അന്നും ഹൃദയം കൊണ്ട് ഏറ്റുവാങ്ങിയത്…‘അപ്പോൾ എങ്ങനാ… ഉറപ്പിക്കാവോ?.’ ” എന്നാണ് താരം ഫേസ്ബുക്കിൽ കുറിച്ചത്.
