വിശാഖപട്ടണം : ഇന്ത്യൻ നാവിക സേനാ ദിനമായ നാലാം തീയതി രാഷ്ട്രപതി ദ്രൗപദി മുർമു വിശിഷ്ടാതിഥിയാകും. വിശാഖപട്ടണം നാവിക ആസ്ഥാനത്ത് നടക്കുന്ന പരിപാടികളിലാണ് മുർമു പങ്കെടുക്കുന്നത്. നാവിക സേനയുടെ കപ്പൽ പടയും മറ്റ് സന്നാഹങ്ങളും നടത്തുന്ന വിവിധ പ്രദർശനങ്ങളായിരിക്കും മുഖ്യ ആകർഷണമെന്ന് നാവിക സേന ഉദ്യോഗസ്ഥർ അറിയിച്ചു.
ബംഗാൾ ഉൾക്കടലിൽ യുദ്ധകപ്പലുകളും നാവിക സേനയുടെ വ്യോമവിഭാഗവും യുദ്ധ സാഹചര്യത്തെ പ്രവർത്തനവും ദുരന്തസമയത്തെ രക്ഷാപ്രവർത്തനങ്ങളും പ്രദർശിപ്പിക്കും. നാവികസേനാ ബാന്റ് സംഘത്തിന്റെ വൃന്ദവാദ്യ പരിപാടികൾ ചടങ്ങിനെ സംഗീത മയമാക്കും.
നാവികസേനാ ആസ്ഥാനത്ത് സേനയുടെ ഇതുവരെയുള്ള ചരിത്രം പൊതുസമൂഹത്തിന് മനസ്സിലാക്കാൻ പാകത്തിന് പ്രദർശനി തയ്യാറായതായും നാവികസേന അറിയിച്ചു. വിവിധ യുദ്ധകപ്പലുകളും വിമാനവാഹിനികളും സന്ദർശിക്കാനും പൊതുജനത്തിന് അവസരമു ണ്ടായിരിക്കും. രാജ്യത്തെ വിവിധ തുറമുഖങ്ങളിലും നാവിക സേനാ ആസ്ഥാനത്തും നാവിക വാരാഘോഷം ആരംഭിച്ചതായും നാവിക സേന അറിയിച്ചു.
