ഗാന്ധിനഗർ: പ്രധാനമന്ത്രി നരേന്ദ്ര മോദിയെ കുറിച്ച് വികാരാധീനനായി സഹോദരൻ സോമഭായ് മോദി. 2014 മുതൽ ദേശീയ തലത്തിൽ നടത്തുന്ന പ്രവർത്തനങ്ങൾ ഏറെ വിലമതിക്കുന്നതാണെന്നും അവ ജനങ്ങൾക്ക് അവഗണിക്കാനാകില്ലെന്നും നരേന്ദ്ര മോദിയുടെ മൂത്ത സഹോദരൻ സോമഭായ് മോദി പറഞ്ഞു. നിയമസഭ തിരഞ്ഞെടുപ്പിൽ അദ്ദേഹത്തിന്റെ പ്രയത്നത്തിന്റെ ഫലം കാണുമെന്നും അദ്ദേഹം പറഞ്ഞു. പ്രധാനമന്ത്രി രാജ്യത്തിന് വേണ്ടി നിരവധി പ്രവർത്തനങ്ങൾ ചെയ്യുന്നുണ്ടെന്നും മൂത്ത സഹോദരൻ സോമഭായ് വ്യക്തമാക്കി.
തങ്ങളുടെ വോട്ടുകൾ നന്നായി വിനിയോഗിക്കണമെന്നും രാജ്യത്തിന്റെ വികസനത്തിനായി പ്രവർത്തിക്കുന്ന പാർട്ടിക്ക് വോട്ട് രേഖപ്പെടുത്തണമെന്നും അദ്ദേഹം ആവശ്യപ്പെട്ടു. നിയമസഭാ തിരഞ്ഞെടുപ്പിന്റെ രണ്ടാം ഘട്ടത്തിൽ അഹമ്മാദാബാദിൽ വോട്ട് രേഖപ്പെടുത്തിയതിന് പിന്നാലെയാണ് സോമഭായ് ഇക്കാര്യം വ്യക്തമാക്കിയത്. അഹമ്മദാബാദിലെ റാണിപ്പിലെ നിഷാൻ പബ്ലിക്ക് സ്കൂളിലാണ് അദ്ദേഹം വോട്ട് രേഖപ്പെടുത്തിയത്.
2014 മുതൽ രാജ്യത്തുണ്ടായ മാറ്റങ്ങൾ പ്രകടമാണെന്നും ജനങ്ങൾ അത് മനസിലാക്കി തന്നെ വോട്ട് രേഖപ്പെടുത്തുമെന്നും അദ്ദേഹം ആത്മവിശ്വാസം പ്രകടിപ്പിച്ചു. അന്ന് മുതൽ നടന്ന വികസന പ്രവർത്തനങ്ങൾ കണ്ടില്ലെന്ന് നടിക്കാനാകില്ലെന്നും അദ്ദേഹം പറഞ്ഞു.
രണ്ടാം ഘട്ടത്തിൽ പ്രധാനമന്ത്രി നരേന്ദ്ര മോദി നിഷാൻ പബ്ലിക്ക് സ്കൂളിലെ പോളിംഗ് സ്റ്റേഷനിലെത്തിയാണ് വോട്ട് രേഖപ്പെടുത്തിയത്. ഗുജറാത്ത്, ഹിമാചൽപ്രദേശ്, ഡൽഹി എന്നിവിടങ്ങളിലെ വോട്ടർമാർ ജനാധിപത്യത്തിന്റെ ഈ ഉത്സവം വളരെ ആവേശത്തോടെയും പ്രതീക്ഷയോടെയും ആഘോഷിച്ചെന്ന് വോട്ട് രേഖപ്പെടുത്തിയതിന് പിന്നാലെ പ്രധാനമന്ത്രി മാദ്ധ്യമങ്ങളോട് പറഞ്ഞു. വോട്ട് രേഖപ്പെടുത്താനെത്തിയ ജനങ്ങളെയും വളരെ ഗംഭീരമായി തിരഞ്ഞെടുപ്പ് നടത്തിയതിന് തിരഞ്ഞെടുപ്പ് കമ്മീഷനെയും അദ്ദേഹം അഭിനന്ദിച്ചിരുന്നു.
