അഹമ്മദാബാദ് : ഗുജറാത്ത് തെരഞ്ഞെടുപ്പിൽ 182 സീറ്റിൽ 156ലും ബിജെപി വിജയിച്ചു. വിജയിച്ചവരിൽ പല പ്രമുഖരും ഉണ്ട് . അതിലൊരാളാണ് ഇന്ത്യൻ ക്രിക്കറ്റ് താരം രവീന്ദ്ര ജഡേജയുടെ ഭാര്യ റിവാബ ജഡേജ . ജാംനഗർ നോർത്ത് സീറ്റിലാണ് റിവാബ മത്സരിച്ചത് .
റിവാബയുടെ വിജയത്തിന് പിന്നാലെ ഭാര്യയെ അഭിനന്ദിച്ചും , ജാംനഗറിലെ ജനങ്ങൾക്ക് നന്ദി പറഞ്ഞും രവീന്ദ്ര ജഡേജ ട്വീറ്റ് ചെയ്തു. ‘ ഹലോ എംഎൽഎ, താങ്കൾക്ക് ഇതിന് അർഹതയുണ്ട്. ജാംനഗറിലെ ജനങ്ങൾ വിജയിച്ചു. എല്ലാ ആളുകളോടും ഞാൻ ആത്മാർത്ഥമായ നന്ദി രേഖപ്പെടുത്തുന്നു. ജാംനഗറിന്റെ പ്രവർത്തനം വളരെ മികച്ചതാകട്ടെ. ജയ് മാതാജി.’ രവീന്ദ്ര ജഡേജ ട്വിറ്ററിൽ കുറിച്ചു. ഒപ്പം ഭാര്യയെ ചേർത്ത് പിടിച്ച് എം എൽ എ ഗുജറാത്ത് എന്നെഴുതിയ ബോർഡുമായി നിൽക്കുന്ന ചിത്രവും രവീന്ദ്ര പങ്ക് വച്ചിട്ടുണ്ട് .
റിവാബ ജഡേജ 50,456 വോട്ടുകൾക്കാണ് ഈ സീറ്റിൽ വിജയിച്ചത് . ഇവിടെ 22,822 വോട്ടുകളാണ് കോൺഗ്രസ് സ്ഥാനാർഥിക്ക് ലഭിച്ചത്. എഎപിയുടെ സ്ഥാനാർത്ഥി കർഷൻ കാരമൂറിന് 33,880 വോട്ടുകൾ ലഭിച്ചു.
സാധാരണ സെലിബ്രിറ്റികളുടെ ഭാര്യമാരിൽ നിന്ന് ഏറെ വ്യത്യസ്തയാണ് റിവ . ഇന്ത്യൻ സംസ്ക്കാരത്തെ ചോദ്യം ചെയ്യുന്ന ഏത് വിഷയത്തിലും വൈകാരികമായി പ്രതികരിച്ചിട്ടുണ്ട് റിവ . മെക്കാനിക്കൽ എൻജിനീയറിങ് ബിരുദധാരിയായ റിവ ജഡേജ കോൺഗ്രസ് നേതാവായിരുന്ന ഹരി സിങ് സോളങ്കിയുടെ അനന്തിരവൾ കൂടിയാണ്
