കേരളത്തിലെ ആരാധകർക്ക് നന്ദി പറഞ്ഞ് ബ്രസീൽ ഫുട്‌ബോൾ താരം നെയ്മർ. കുട്ടിയെ പുറത്തേറ്റി തന്റെ കൂറ്റൻ കട്ടൗട്ട് നോക്കി നിൽക്കുന്ന ആരാധകന്റെ ചിത്രത്തോടൊപ്പമാണ് നെയ്മർ കുറിപ്പ് പങ്കുവെച്ചത്. ‘ലോകത്തിലെ എല്ലായിടങ്ങളിൽ നിന്നും സ്‌നേഹം വരുന്നു, വളരെ നന്ദി കേരളം, ഇന്ത്യ’ എന്നാണ് താരം ഇൻസ്റ്റഗ്രമിൽ കുറിച്ചത്.
നെയ്മർ ജൂനിയറിന്റെ വെബ്‌സൈറ്റിന്റെ പേരിലുള്ള ഇൻസ്റ്റഗ്രാം അക്കൗണ്ടിലാണ് കേരളത്തിന് നന്ദി അറിയിച്ചുള്ള കുറിപ്പ് പങ്കുവെച്ചിരിക്കുന്നത്. മലപ്പുറം ചങ്ങരംകുളത്ത് ഒതല്ലൂരിൽ ബ്രസീൽ ആരാധകർ സ്ഥാപിച്ച ഫ്ലെക്സ്സാണ് ചിത്രത്തിലുള്ളത്.
ലോകകപ്പ് തുടങ്ങുന്നതിന് മുൻപ് തന്നെ കേരളത്തിൽ വിവിധയിടങ്ങളിൽ പ്രിയ ടീമുകളുടെ കട്ടൗട്ടുകൾ പ്രത്യക്ഷപ്പെട്ടിരുന്നു. ഇതിൽ വൈറലായ ഒന്നായിരുന്നു കോഴിക്കോട് പുള്ളാവൂരിലെ കട്ടൗട്ട്. ചെറുപുഴയിലെ തുരുത്തിൽ ലയണൽ മെസ്സിയുടെ കട്ടൗട്ടാണ് ആദ്യം പ്രത്യക്ഷപ്പെട്ടത്. പിന്നാലെ ക്രിസ്റ്റ്യാനോ റൊണാൾഡോയുടെയും കട്ടൗട്ട് ആരാധകർ സ്ഥാപിച്ചിരുന്നു. വൈകാതെ ഇത് വിവാദമാകുകയും ചെയ്തിരുന്നു. എന്നാൽ കട്ടൗട്ടുകൾ നീക്കില്ലെന്ന നിലപാടിലായിരരുന്നു ആരാധകർ. ഇതിന്റെ ചിത്രങ്ങൾ ഫിഫയും തങ്ങളുടെ ട്വിറ്റർ പേജിൽ പങ്കുവെച്ചിരുന്നു.
