മോസ്കോ: നരകത്തിലേക്കുള്ള വാതിലെന്ന് വിശേഷിപ്പിക്കുന്ന ഭീമൻ ഗർത്തം റഷ്യയിൽ രൂപപ്പെട്ടതായി റിപ്പോർട്ട്. റഷ്യയിലെ പോപ്പുലർ സ്കൈ റിസോർട്ടിന് സമീപം രൂപപ്പെട്ട 100 അടി താഴ്ചയുള്ള ഗർത്തമാണ് കാഴ്ചക്കാരെ വിസ്മയിപ്പിക്കുന്നത്. റഷ്യയിലെ ഷെരെഗേഷ് ഖനിയ്ക്ക് സമീപമാണ് സംഭവം. കാഴ്ചയിൽ അത്യധികം ഭീകരത തോന്നുന്ന ഗർത്തത്തിന്റെ ചിത്രങ്ങൾ സമൂഹമാദ്ധ്യമങ്ങളിൽ വൈറലാണ്.
റഷ്യയിലെ സിബേരിയയിലാണ് ഗർത്തം രൂപപ്പെട്ട ഖനി പ്രദേശമുള്ളത്. പെട്ടെന്നൊരു ദിവസം ഭൂമി പിളർന്നു പോകുകയായിരുന്നു. എന്നാൽ ഇത്തരമൊരു അപകടം സംഭവിക്കുമെന്ന സൂചന നേരത്തെ ലഭിച്ചിരുന്നതിനാൽ റിസോർട്ടിലുള്ളവരെയും സമീപത്തെ വീടുകളിൽ താമസിക്കുന്നവരെയും മാറ്റി പാർപ്പിച്ചിരുന്നു. സ്റ്റീൽ നിർമ്മാതാക്കളായ എവ്റാസ് എന്ന കമ്പനിയുടെ ഉടമസ്ഥതയിലാണ് ഖനിയുള്ളത്.
ഭീമൻ ഗർത്തം ഭാവിയിൽ നികത്തുമെന്നാണ് കമ്പനി അറിയിക്കുന്നത്. ഗർത്തം രൂപപ്പെട്ടതിനാൽ ഖനിയിലെ പ്രവർത്തനങ്ങൾ താത്കാലികമായി നിർത്തിവച്ചിരിക്കുകയാണ്. രാജ്യത്തിനാവശ്യമായ വലിയൊരു വിഭാഗം കൽക്കരിയും സ്റ്റീലും ഉത്പാദിപ്പിക്കുന്ന ഖനിയാണിതെന്നാണ് റിപ്പോർട്ട്.
Comments