ന്യൂഡൽഹി: പ്രധാനമന്ത്രി നരേന്ദ്ര മോദിയെ പ്രശംസിച്ച് ഗൂഗിൾ സിഇഒ സുന്ദർ പിച്ചൈ. പ്രധാനമന്ത്രിയുടെ നേതൃത്വത്തിൽ സാങ്കേതിക വിദ്യയിലുണ്ടായ മാറ്റം വളരെ വലുതാണെന്നും ഏറെ പ്രതീക്ഷ നൽകുന്നതാണെന്നും അദ്ദേഹം പറഞ്ഞു. ജി20 അദ്ധ്യക്ഷ പദവി പ്രധാനമന്ത്രിയുടെ കരങ്ങളിൽ ലഭിച്ചത് ഗുണകരമാകുമെന്നും തന്റെ പൂർണ്ണ പിന്തുണയുള്ളതായും അദ്ദേഹം വ്യക്തമാക്കി. ഡിസംബർ ഒന്നിനാണ് ഇന്തോനേഷ്യയിൽ നിന്ന് ഇന്ത്യ ജി20 അദ്ധ്യക്ഷ പദവി ഏറ്റുവാങ്ങിയത്.
സുന്ദർ പിച്ചൈയെ രാജ്യം മൂന്നാമത്തെ പരമോന്നത ബഹുമതിയായ പത്മഭൂഷൺ നൽകി ആദരിച്ചിരുന്നു. 2022-ലെ ട്രേഡ് ആന്റ് ഇൻഡസ്ട്രി വിഭാഗത്തിലാണ് പത്മഭൂഷൺ സമ്മാനിച്ചത്. സാൻഫ്രാൻസിസ്കോയിൽ അടുത്ത കുടുംബാംഗങ്ങളുടെ സാന്നിധ്യത്തിലായിരുന്നു അദ്ദേഹത്തിന് ബഹുമതി നൽകിയത്. ഇന്ത്യ എന്റെ ഭാഗമാണ് താൻ എവിടെ പോയാലും അത് തന്റെ കൂടു കൊണ്ടുപോകുമെന്നാണ് പത്മഭൂഷൺ ഏറ്റുവാങ്ങിയതിന് പിന്നാലെ അദ്ദേഹം പറഞ്ഞത്.
പ്രധാനമന്ത്രിയുടെ ഡിജിറ്റൽ ഇന്ത്യ എന്ന കാഴ്ചപ്പാട് സാങ്കേതിക വിദ്യയുടെ പുരോഗതിയെ ത്വരിതപ്പെടുത്തുന്നതാണെന്നും ഇതിന്റെ നേട്ടങ്ങൾ കൂടുതൽ ആളുകളിലേക്ക് എത്തിക്കുന്നതിനായി ഗൂഗിളും ഇന്ത്യയും ഒരുമിച്ച് പ്രവർത്തിക്കുകയാണെന്ന് അദ്ദേഹം അന്ന് പറഞ്ഞിരുന്നു. ഡിജിറ്റൽ വിപ്ലവം പൂർണമായി ഉപയോഗിക്കുമെന്നും പിച്ചൈ പറഞ്ഞു.
