ഒരു വീട്ടിലെ എല്ലാവരുടെയും പിറന്നാൾ ഒരു ദിവസം തന്നെയാകുന്നതിനെക്കുറിച്ച് നിങ്ങൾ ചിന്തിച്ചിട്ടുണ്ടോ.. അച്ഛനും അമ്മയും കുഞ്ഞും ഒരേ ദിവസം പിറന്നാൾ ആഘോഷിക്കുന്നു.. അങ്ങനെ സംഭവിക്കാമെങ്കിലും അത്തരമൊരു കുടുംബം ഉണ്ടാകുന്നതിനുള്ള സാധ്യത വളരെ അപൂർവ്വമാണെന്ന് നമുക്കറിയാം. എന്നാൽ കഴിഞ്ഞ ഡിസംബർ 18ഓട് കൂടി അത് നടന്നിരിക്കുകയാണ്.
അമേരിക്കയിലെ ദമ്പതികളായ കാസിഡിക്കും ഡൈലൻ സ്കോട്ടിനും ഡിസംബർ 18നാണ് കുഞ്ഞു പിറന്നത്. അന്നേ ദിവസത്തിന് ഒരു പ്രത്യേകതയുണ്ടായിരുന്നു. ഭാര്യാഭർത്താക്കൻമാരായ കാസിഡിയും ഡൈലൻ സ്കോട്ടും പിറന്ന ദിവസമാണത്. ഇരുവരുടെയും ആദ്യ കുഞ്ഞ് ജനിച്ചത് ദമ്പതികളുടെ ഡെയ്റ്റ് ഓഫ് ബെർത്തിന്റെ അന്നുതന്നെയായത് തികച്ചും ആകസ്മികമായിരുന്നു.
ഡിസംബർ 17ന് വൈകിട്ടായിരുന്നു കാസിഡി ലേബർ റൂമിലേക്ക് പ്രവേശിച്ചത്. അന്ന് അർദ്ധരാതി പിന്നിട്ടതോടെ, കൃത്യമായി പറഞ്ഞാൽ സമയം 12.30ന് അവൾ പ്രസവിച്ചു. കാസിഡിക്ക് പെൺകുഞ്ഞ് പിറന്നു. അപ്പോൾ ദിവസം ഡിസംബർ 18 ആയിരുന്നു.
ഇത്തരത്തിൽ മാതാപിതാക്കളുടെയും കുഞ്ഞിന്റെയും ബെർത്ത് ഡേ ഒരേ ദിവസം സംഭവിക്കുന്നതിന് 1,33,000ത്തിൽ ഒന്ന് മാത്രം സാധ്യതയാണുള്ളതെന്നാണ് കണക്കുകൾ സൂചിപ്പിക്കുന്നത്.
ദമ്പതികൾക്ക് കുഞ്ഞ് ജനിച്ച വിവരം സോഷ്യൽ മീഡിയയിൽ പോസ്റ്റ് ചെയ്തതോടെ നിരവധി പേർ ആശംസാപ്രവാഹവുമായി എത്തി. ഇനി എല്ലാവർഷവും ഒരു ദിവസം തന്നെ മൂന്ന് പേർക്കും പിറന്നാൾ ആഘോഷിക്കാമല്ലോയെന്നും ഈ കാഴ്ച അപൂർവ്വമാണെന്നും കമന്റുകളിൽ നിറഞ്ഞു.
Comments