മലയാളികൾക്ക് മാത്രമല്ല ലോകമെമ്പാടുമുള്ള ആഹാര പ്രേമികൾക്ക് പ്രിയപ്പെട്ട ഒന്നാണ് ഉരുളക്കിഴങ്ങ്. കറിയായും ഉപ്പേരിയായും മെഴുക്കുപുരട്ടിയായുമെല്ലാം ദിവസവും ഉരുളക്കിഴങ്ങ് കഴിക്കുന്നവരുണ്ട്. ഇവ വറുത്തെടുത്ത് ഫ്രഞ്ച് ഫ്രൈസായും ചിപ്സായും അകത്താക്കുന്നവരും കുറവല്ല. ഉരുളക്കിഴങ്ങിനോട് വല്ലാത്തൊരു താൽപര്യമാണ് പൊതുവെ ഭക്ഷണ പ്രേമികൾ കാണിക്കാറുള്ളത്. എന്നാൽ ഇത്തരത്തിൽ ഉരുളക്കിഴങ്ങ് ദിവസവും കഴിക്കുന്നത് ശരീരത്തിന് നല്ലതാണോ? നോക്കാം..
ഉരുളക്കിഴങ്ങ് വേവിച്ച് ദിവസവും ആഹാരത്തിന്റെ ഭാഗമാക്കുന്നതിൽ ആരോഗ്യ പ്രശ്നങ്ങൾ ഒന്നും തന്നെയില്ല. മിതമായ അളവിൽ അധികം ഉപ്പ് ചേർക്കാതെ ഉരുളക്കിഴങ്ങ് ദിവസവും കഴിക്കാവുന്നതാണ്. പോഷക സമ്പന്നമായ പദാർത്ഥമായതിനാൽ ഇത് ശരീരത്തിന് ഏറെ ഗുണം ചെയ്യുമെന്നും ആരോഗ്യവിദഗ്ധർ പറയുന്നു. എന്നാൽ ഫ്രഞ്ച് ഫ്രൈസ് ആരാധകരും ചിപ്സ് പ്രേമികളും ദിവസവും അതുതന്നെ കഴിച്ചാൽ പണി പാളുമെന്നാണ് പഠനങ്ങൾ പറയുന്നത്.
ഓരോരുത്തരുടെയും ശരീര പ്രകൃതിയനുസരിച്ചാണ് ഇത് ദോഷകരമായി ബാധിക്കുക. ചിലർക്ക് അനാരോഗ്യകരമായ രീതിയിൽ വണ്ണം വയ്ക്കുന്നതിനും ശരീരത്തിൽ കൊഴുപ്പിന്റെ അളവ് കൂടുന്നതിനുമെല്ലാം ഇത് കാരണമാകും. അതിനാൽ ഒരു കാരണവശാലും ഫ്രഞ്ച് ഫ്രൈസും ഉരുളക്കിഴങ്ങ് ചിപ്സും ദിവസേന കഴിക്കരുതെന്നാണ് ഡോക്ടർമാർ പറയുന്നത്. അതേസമയം ഉപ്പും എണ്ണയും കുറച്ച് വേവിച്ച ഉരുളക്കിഴങ്ങ് ദിവസവും അകത്താക്കാം.
വിറ്റമിൻ സി, ബി6, മഗ്നീഷ്യം, ഫോസ്ഫറസ്, ഫൈബർ, പ്രോട്ടീനുകൾ എന്നിവ ഉരുളക്കിഴങ്ങിൽ അടങ്ങിയിട്ടുണ്ട്. ധാരാളം ഫ്ളവനോയിഡുകളും ഫെനോളിക് ആസിഡും അടങ്ങിയിട്ടുള്ള ഉരുളക്കിഴങ്ങ് ആന്റി-ഓക്സിഡന്റുകളുടെ കലവറയാണ്. രക്തത്തിലെ പഞ്ചസാരയുടെ അളവ് നിയന്ത്രിക്കാനും ഉരുളക്കിഴങ്ങ് സഹായിക്കും. ഇവയിൽ അടങ്ങിയിരിക്കുന്ന പ്രത്യേകതരം അന്നജം ദഹനം സുഗമമാക്കാനും ഗുണം ചെയ്യും. അതിനാൽ മിതമായ അളവിൽ ദിവസവും ഉരുളക്കിഴങ്ങ് കഴിക്കുന്നത് ആരോഗ്യപരമാണ്.
Comments