ഫുട്ബോള് സൂപ്പര് താരം ക്രിസ്റ്റ്യാനോ റൊണാള്ഡോയ്ക്ക് ക്രിസ്തുമസ് സമ്മാനം നൽകി കാമുകി ജോര്ജീന റോഡ്രിഗസ്. സൂപ്പര് താരത്തിന് സൂപ്പർ കാർ തന്നെയാണ് കാമുകി സമ്മാനമായി നൽകിയിരിക്കുന്നത്. റോള്സ് റോയ്സ് ഫാന്റമാണ് റൊണാള്ഡോയ്ക്ക് ലഭിച്ചത്. കാര് നല്കുന്നതിന്റെ വീഡിയോ ജോര്ജീന തന്നെയാണ് ആരാധകരുമായി പങ്കുവെച്ചത്. സർപ്രൈസ് സമ്മാനം കണ്ട് ക്രിസ്റ്റ്യാനോ അത്ഭുതപ്പെടുന്നതും വീഡിയോയിൽ കാണാം. കാറിന് പുറമേ കുട്ടികള്ക്ക് സൈക്കിളുകളും ബാഗുകളും ജോര്ജീന സമ്മാനമായി നൽകി. സർപ്രൈസ് ഒരുക്കിയ കാമുകിക്ക് താരം നന്ദി അറിയിക്കുകയും ചെയ്തു. ഇന്സ്റ്റഗ്രാമിലൂടെ ജോര്ജീന പങ്കുവെച്ച വീഡിയോ ചുരുങ്ങിയ നിമിഷങ്ങൾ കൊണ്ടാണ് വൈറലായത്.
ആഡംബര കാറുകളിലെ രാജാവായ റോൾസ് റോയ്സ് ഫാന്റം ഇന്ത്യൻ വിപണിയിലും ലഭ്യമാണ്. 2018 ഫെബ്രുവരിയിലാണ് എട്ടാം തലമുറ റോൾസ് റോയ്സ് ഫാന്റം ഇന്ത്യൻ വിപണിയിലെത്തിയത്. സ്റ്റാൻഡേർഡ് വീൽ ബേസ്, എക്സ്റ്റൻഡഡ് വീൽബേസ് എന്നീ രണ്ട് വകഭേദങ്ങളിലാണ് റോൾസ് റോയ്സ് ലഭിക്കുന്നത്. ഇന്ത്യയിലെ ഏറ്റവും വില കൂടിയ കാറുകളിലൊന്നാണ് റോൾസ് റോയ്സ് ഫാന്റം. 11 കോടിയ്ക്ക് മുകളിലാണ് വാഹനത്തിന്റെ വില.
മറ്റേതൊരു റോൾസ് റോയ്സ് കാറിനെക്കാളും പ്രീമിയം ഇന്റീരിയറാണ് ഫാന്റത്തിന്. ഇന്റീരിയറിൽ തന്നെ കോടികളാണ് ബ്രാന്റ് ചിലവിട്ടിരിക്കുന്നത്. 563 എച്ച്പി കരുത്തും 900 എൻഎം ടോർക്കും ഉത്പാദിപ്പിക്കുന്ന 6.75 ലിറ്റർ V12 എഞ്ചിനാണ് റോൾസ് റോയ്സ് ഫാന്റം VIII-ന് കരുത്ത് പകരുന്നത്. ലക്ഷ്വറി പ്ലാറ്റ്ഫോമിന്റെ മോഡുലാർ ആർക്കിടെക്ചറിനെ അടിസ്ഥാനമാക്കിയുള്ള ആദ്യത്തെ റോൾസ് റോയ്സ് മോഡൽ കൂടിയാണ് ഫാന്റം VIII. ഇതൊരു ഓൾ-അലൂമിനിയം സ്പേസ്ഫ്രെയിം ഷാസിയാണ്.
