ന്യൂഡല്ഹി: ജപ്പാനില് നടക്കുന്ന ഏഷ്യന് ഗെയിംസിനായുള്ള ക്രമീകരണങ്ങളില് ബിസിസിഐയും ഏഷ്യന് ക്രിക്കറ്റ് കൗണ്സിലും (എസിസി) അതൃപ്തി പ്രകടിപ്പിച്ചതായി നേരത്തെ റിപ്പോര്ട്ടുകള് പുറത്തുവന്നിരുന്നു. ക്രമീകരണങ്ങള് തൃപ്തികരമല്ലെങ്കില് ഇന്ത്യ ബി ടീമിനെ അയച്ചേക്കുമെന്നായിരുന്നു വാര്ത്താ ഏജന്സിയായ എഎന്ഐ റിപ്പോര്ട്ട് ചെയ്തത്. എന്നാല്, നിലവിലെ പ്രശ്നങ്ങള് നിലനില്ക്കുന്നുണ്ടെങ്കിലും മറ്റൊരു ടീമിനെ അയക്കാന് ഇന്ത്യയ്ക്ക് പദ്ധതിയില്ലെന്ന് ബിസിസിഐ വൃത്തങ്ങള് വ്യക്തമാക്കിയതായതാണ് പുറത്ത് വരുന്ന റിപ്പോര്ട്ട്.
കളിക്കാര്ക്കുള്ള ഡ്രസ്സിങ് റൂമുകള് താല്ക്കാലിക ടെന്റുകളിലാണ് ഒരുക്കിയിരിക്കുന്നതെന്നും അവയില് നിന്ന് ഏകദേശം 500 മീറ്റര് അകലെയാണ് വാഷ്റൂമുകളെന്നും എസിസി യോഗത്തില് ബിസിസിഐ ജപ്പാന് ഒളിമ്പിക് അധികൃതരെ അറിയിച്ചതായാണ് റിപ്പോര്ട്ട്. ഹോട്ടല് മുറികള് വളരെ ചെറുതാണെന്നതും താരങ്ങള്ക്ക് ആശങ്കയുണ്ടാക്കുന്നുണ്ട്. സ്ഥിതിഗതികള് നേരിട്ട് വിലയിരുത്തുന്നതിനായി ബിസിസിഐ ജപ്പാനിലേക്ക് ഒരു നിരീക്ഷകനെ അയച്ചേക്കുമെന്നും വിവരമുണ്ട്.
എന്നാല് ക്രമീകരണങ്ങളുമായി ബന്ധപ്പെട്ട പരാതികള് ശരിയാണെങ്കിലും ഇന്ത്യയുടെ പ്രധാന ടീമിനെ പിന്വലിച്ച് ബി ടീമിനെ അയക്കുന്ന സാഹചര്യമില്ലെന്നാണ് ബിസിസിഐ നിലപാട്. 2023ല് ചൈനയിലെ ഹാങ്ചൗവില് നടന്ന ഏഷ്യന് ഗെയിംസില് ഇന്ത്യ ക്രിക്കറ്റ് സ്വര്ണം നേടിയിരുന്നു. അഫ്ഗാനിസ്ഥാനെതിരായ ഫൈനല് മഴമൂലം ഉപേക്ഷിച്ചതിനെ തുടര്ന്ന് ഉയര്ന്ന സീഡിങ്ങിന്റെ ആനുകൂല്യത്തിലാണ് ഇന്ത്യ അന്ന് ജേതാക്കളായത്. ഇത്തവണയും ഇന്ത്യ ശക്തമായ പുരുഷ ടീമിനെയാണ് അണിനിരത്തുന്നത്. ശ്രേയസ് അയ്യര് നയിക്കുന്ന ടീമില് ജസ്പ്രീത് ബുംറ, അര്ഷ്ദീപ് സിങ്, അഭിഷേക് ശര്മ, വൈഭവ് സൂര്യവംശി, ഇഷാന് കിഷന്, തിലക് വര്മ്മ തുടങ്ങിയ പ്രമുഖ താരങ്ങളുണ്ട്. സഞ്ജു സാംസണും ടീമിന്റെ ഭാഗമാണ്.
ഇന്ത്യന് പുരുഷ ടി20 ടീം: ശ്രേയസ് അയ്യര് (ക്യാപ്റ്റന്), തിലക് വര്മ്മ (വൈസ് ക്യാപ്റ്റന്), സഞ്ജു സാംസണ് (വിക്കറ്റ് കീപ്പര്), അഭിഷേക് ശര്മ, ഇഷാന് കിഷന് (വിക്കറ്റ് കീപ്പര്), ശിവം ദുബെ, അക്ഷര് പട്ടേല്, വാഷിങ്ടണ് സുന്ദര്, നിതീഷ് കുമാര് റെഡ്ഡി, വരുണ് ചക്രവര്ത്തി, രവി ബിഷ്ണോയ്, ഹര്ഷിത് റാണ, അര്ഷ്ദീപ് സിങ്, വൈഭവ് സൂര്യവംശി, ജസ്പ്രീത് ബുംറ.
വനിതാ വിഭാഗത്തിലും ഇന്ത്യ സീനിയര് താരങ്ങളടങ്ങിയ ശക്തമായ ടീമിനെയാണ് പ്രഖ്യാപിച്ചിരിക്കുന്നത്. ഹര്മന്പ്രീത് കൗര് നയിക്കുന്ന ടീമില് സ്മൃതി മന്ദാന, ഷഫാലി വര്മ്മ, ജെമീമ റോഡ്രിഗസ്, ദീപ്തി ശര്മ്മ, റിച്ച ഘോഷ് തുടങ്ങിയ പ്രമുഖ താരങ്ങളുണ്ട്.
ഇന്ത്യന് വനിതാ ടി20 ടീം: ഹര്മന്പ്രീത് കൗര് (ക്യാപ്റ്റന്), സ്മൃതി മന്ദാന (വൈസ് ക്യാപ്റ്റന്), ഷഫാലി വര്മ്മ, ജെമീമ റോഡ്രിഗസ്, ദീപ്തി ശര്മ്മ, റിച്ച ഘോഷ് (വിക്കറ്റ് കീപ്പര്), ജി. കമാലിനി (വിക്കറ്റ് കീപ്പര്), ഭാരതി ഫുല്മാലി, ശ്രീ ചരണി, രേണുക താക്കൂര്, ക്രാന്തി ഗൗഡ്, അരുന്ധതി റെഡ്ഡി, ശ്രേയങ്ക പാട്ടീല്, രാധാ യാദവ്, നന്ദിനി ശര്മ്മ.
