ന്യൂഡല്ഹി: 2024 തിരഞ്ഞെടുപ്പിലും പ്രതിപക്ഷത്തിന്റെ പ്രധാനമന്ത്രി സ്ഥാനാര്ത്ഥി രാഹുല് ഗാന്ധി തന്നെയെന്ന് മുതിര്ന്ന കോണ്ഗ്രസ് നേതാവ് കമല്നാഥ്. രാഹുല് ഗാന്ധിയുടെ കുടുംബത്തെ പോലെ രാജ്യത്തിനായി ത്യാഗം ചെയ്ത മറ്റൊരു കുടുംബം ഭാരതത്തിലില്ല. രാജ്യത്തിന് വേണ്ടിയാണ് രാഹുല് ജോഡോ യാത്ര നടത്തുന്നതെന്നും കമല്നാഥ് പറഞ്ഞു.
2024ല് പ്രതിപക്ഷത്തിന്റെ മുഖമായല്ല പ്രധാനമന്ത്രി സ്ഥാനാര്ത്ഥിയായിട്ടാകും രാഹുല് ഗാന്ധിയെ പരിഗണിക്കുന്നത്. രാഹുല് നടത്തുന്നത് പോലെയുള്ള ഒരു പദയാത്ര ലോക ചരിത്രത്തില് തന്നെയുണ്ടായിട്ടില്ല. അധികാരത്തിനായുള്ള രാഷ്ട്രീയമല്ല, ജനങ്ങള്ക്കുവേണ്ടിയുള്ള പ്രവര്ത്തനങ്ങളാണ് രാഹുല് ഗാന്ധി നടത്തുന്നതെന്നും കമല്നാഥ് പറഞ്ഞു. വാര്ത്താ ഏജന്സിക്ക് നല്കിയ അഭിമുഖത്തിലായിരുന്നു കമല്നാഥിന്റെ പ്രതികരണം.
അതേ സമയം ജോഡോ യാത്രയ്ക്കെതിരെ സമാജ്വാദി നേതാവ് അഖിലേഷ് യാദവ് രംഗത്തുവന്നത് കോണ്ഗ്രസിന് തിരിച്ചടിയായി. യാത്രയില് പങ്കെടുക്കില്ലായെന്ന് അഖിലേഷ് യാദവ് വ്യക്തമാക്കി. കോണ്ഗ്രസില് നിന്നും വ്യത്യസ്തമാണ് തങ്ങളുടെ പാര്ട്ടിയുടെ പ്രത്യയ ശാസ്ത്രം എന്നായിരുന്നു യാത്രയെക്കുറിച്ചുള്ള മാദ്ധ്യമങ്ങളുടെ ചോദ്യത്തിന് അദ്ദേഹം നല്കിയ മറുപടി.
യാത്രയില് ഉടനീളം പ്രതിപക്ഷനിരയിലെ പ്രധാന നേതാക്കളെ പങ്കെടുപ്പിക്കാന് കോണ്ഗ്രസ് ശ്രമിച്ചിരുന്നു. എംകെ സ്റ്റാലിന്, കമലഹാസന്, ആദിത്യാ താക്കറെ തുടങ്ങിയവര് യാത്രയുടെ ഭാഗമായി. എന്നാല് പ്രതിപക്ഷ നിരയിലെ പ്രധാന പാര്ട്ടിയായ എസ്പി യാത്രയോടുള്ള നയം വ്യക്തമാക്കിയത് കോണ്ഗ്രസ് നീക്കങ്ങള്ക്ക് തിരിച്ചടി ആയിരിക്കുകയാണ്.
