മലയാള സിനിമാ പ്രേക്ഷകർക്കിടയിൽ മികച്ച അഭിപ്രായം നേടി തീയേറ്ററുകൾ കീഴടക്കുകയാണ് ഉണ്ണിമുകുന്ദൻ ചിത്രമായ മാളികപ്പുറം. ഡിസംബർ 30ന് റിലീസ് ചെയ്ത സിനിമയ്‌ക്ക് ഗംഭീര പ്രതികരണമാണ് ലഭിക്കുന്നത്. സിനിമ കണ്ടിറങ്ങുന്ന ഓരോരുത്തരും നൽകുന്ന പോസിറ്റീവ് റിവ്യൂവായിരുന്നു ശേഷിക്കുന്നവരെയും സിനിമ കാണാൻ പ്രേരിപ്പിച്ചത്. ഇപ്പോഴിതാ ചിത്രത്തിന്റെ ജിസിസി റിലീസ് തീയതിയും പ്രഖ്യാപിച്ചിരിക്കുകയാണ് മാളികപ്പുറത്തിന്റെ അണിയറ പ്രവർത്തകർ.
യുഎഇ, ജിസിസി രാജ്യങ്ങളിൽ ജനുവരി അഞ്ചിന് ചിത്രം റിലീസ് ചെയ്യുമെന്നാണ് റിപ്പോർട്ട്. സിനിമയുടെ തമിഴ്, തെലുങ്ക്, പതിപ്പുകളും ഉടൻ റിലീസ് ചെയ്യും. ജനുവരി ആറിനാണ് ഇതരഭാഷകളിൽ മാളികപ്പുറം റിലീസ് ചെയ്യുന്നത്.
നവാഗതനായ വിഷ്ണു ശശി ശങ്കർ സംവിധാനം ചെയ്ത് അഭിലാഷ് പിള്ളൈ രചിച്ച ചിത്രമാണ് മാളികപ്പുറം. ബാലികയായ കല്ല്യാണിയുടെ ശബരിമലയിലേക്കുള്ള യാത്രയാണ് ചിത്രത്തിന്റെ പ്രമേയം. കല്ല്യാണിയായും കളിക്കൂട്ടുകാരൻ പീയൂഷായും എത്തിയ രണ്ട് ബാലാതാരങ്ങളും മികച്ച പ്രകടനം കാഴ്ചവച്ചുവെന്നാണ് സിനിമ കണ്ടവരുടെ പ്രതികരണങ്ങൾ സൂചിപ്പിക്കുന്നത്.
