ഒരു ശരാശരി മലയാളിയുടെ ഏറ്റവും തിരക്കേറിയ സമയമാണ് രാവിലെ. ജോലിയ്ക്കും സ്കൂളിലും കോളേജിലും തുടങ്ങി വിവിധയിടങ്ങളിൽ പോകാൻ ഒരുങ്ങുന്ന സമയമാണല്ലോ രാവിലെ എന്നത്. അതിനാൽ തന്നെ ഭൂരിഭാഗം ആളുകളും ഒഴിവാക്കുന്ന ഒന്നാണ് പ്രഭാത ഭക്ഷണം. രാവിലെ ഉണ്ടാക്കാനുള്ള ബുദ്ധിമുട്ടും മടിയും തലേ ദിവസത്തെ ക്ഷീണവും എല്ലാം ഇതിന്റെ പിന്നിലുണ്ടാകാം.
ഒരു മുട്ട എങ്കിലും എടുക്കാനില്ലാത്ത വീട് അപൂർവ്വമായിരിക്കും. അതിനാൽ തന്നെ വളരെ എളുപ്പത്തിൽ പ്രാതലും ഉണ്ടാക്കാൻ കഴിയും. മുട്ട കൊണ്ട് വെറൈറ്റി ആയ വിഭവങ്ങൾ തയ്യാറാക്കാവുന്നതാണ്. ഒരു ദിവസത്തെ ആരോഗ്യം മുഴുവൻ ലഭിക്കുന്നത് പ്രഭാത ഭക്ഷണത്തിൽ നിന്നാണ് എന്നാണ് ആരോഗ്യ വിദഗ്ധർ പറയുന്നത്. അതിനാൽ തന്നെ ദിവസത്തിന് വേണ്ട ഊർജ്ജം മുട്ടയിൽ നിന്ന് തന്നെയാകാം.
ആദ്യത്തെ പ്രാതലാണ് മുട്ട ദോശ. മുട്ട നന്നായി അടിച്ച സവോള,പച്ചമുളക്, ഉപ്പ് എന്നിവ ചേർത്ത് വെക്കുക. പുളിച്ച ദോശ മാവ് ഉപയോഗിച്ച് വലിയ ദോശ ചുടുക.അതിന് മുകളിൽ മുട്ട മിശ്രിതം നന്നായി പരത്തി ഒഴിച്ച് നെയ്യ് തൂവുക. മുട്ട മിശ്രിതം വെന്ത് കഴിഞ്ഞാൽ സ്വാദൂറും മുട്ട ദോശ റെഡി.
അടുത്തത് ബ്രഡും മുട്ടയും ചേർത്തുള്ള പലഹാരമാണ്. ബ്രഡ് മിക്സിയിൽ പൊടിച്ചെടുക്കുക. മുട്ട അടിച്ചെടുത്തതിലേക്ക് ബ്രഡ് പൊടി ചേർക്കുക. ഇത് നന്നായി മിക്സ് ചെയ്ത് വാനില എസൻസും പഞ്ചസാരയും ചേർത്ത് അടിച്ചെടുക്കണം. ഈ കൂട്ട് എണ്ണ ഒഴിച്ച കുഴിയുള്ള പാനിൽവെച്ച് ചെറുതീയിൽ കേക്ക് പോലെ അടച്ചുവെച്ച് വേവിച്ചെടുത്തുക. ഈ പലഹാരവും ഒരു ഗ്ളാസ് പാലും ശീലമാക്കുന്നത് ശരീരത്തിൽ ആവശ്യമായ പോഷകങ്ങൾ നൽകും.
മുട്ട പുഴുങ്ങി തോടു കളഞ്ഞെടുത്ത് വെള്ളക്കുരു നീളത്തിൽ അരിയുന്നു.മഞ്ഞക്കുരു മുഴുവൻ ഉപയോഗിക്കണം. തിരുമ്മിയ തേങ്ങ, പച്ചമുളക്, ചുവന്നുള്ളി, മഞ്ഞൾപ്പൊടി, മുളകുപൊടി എന്നിവ അരച്ചെടുക്കുക. സവാള നീളത്തിലരിഞ്ഞ് തിളപ്പിക്കണം. ഏതാണ്ട് വറ്റാറാകുമ്പോൾ അരിഞ്ഞു വച്ച മുട്ട ചേർത്തിളക്കി ചൂടാക്കി വെളിച്ചെണ്ണ താളിച്ചെടുത്താൽ മുട്ട അവിയൽ റെഡി ആയി.
