തിരുവനന്തപുരം: കലോത്സവ പാചകത്തില്‍ നിന്നും വിട്ടുനില്‍ക്കുമെന്ന് പഴയിടം മോഹനന്‍ നമ്പൂതിരി പറഞ്ഞത് വിവാദമാക്കേണ്ടതില്ലെന്ന് വിദ്യാഭ്യാസ മന്ത്രി വി. ശിവന്‍കുട്ടി. ടെന്‍ഡര്‍ പ്രകാരം ഒന്നാമതെത്തിയ വ്യക്തിയാണ് പഴയിടം. കോഴിക്കോട് കലോത്സത്തില്‍ ഏല്‍പ്പിച്ച ജോലി അദ്ദേഹം കൃത്യമായി നിര്‍വഹിച്ചു. ഇക്കാര്യത്തില്‍ സര്‍ക്കാരിന് ഒരു പരാതിയുമില്ലെന്ന് മന്ത്രി പറഞ്ഞു.
‘കേരളത്തിന്റെ അഭിപ്രായം ഒന്നോ രണ്ടോ പേരുടേതല്ല. സാമൂഹ മാദ്ധ്യമത്തില്‍ പോസ്റ്റിടുന്നവര്‍ കാര്യങ്ങള്‍ അറിഞ്ഞുവേണം പ്രതികരിക്കാന്‍. ചിലരുടെ അഭിപ്രായം അദ്ദേഹത്തെ വേദനിപ്പിച്ചെന്നുവേണം കരുതാന്‍. ജാതീയമായ പരാമര്‍ശം സംസ്‌കാരത്തിന് ചേര്‍ന്നതല്ല’ മന്ത്രി പറഞ്ഞു.
തനിക്കെതിരെ സാമൂഹ മാദ്ധ്യമങ്ങളില്‍ നടന്ന പ്രചരണം തന്നെ വേദനിപ്പിച്ചെന്ന് പഴയിടം നമ്പൂതിരി പറഞ്ഞിരുന്നു. അതിനാല്‍ അടുത്ത കലോത്സവം മുതല്‍ പാചകത്തിന്റെ ചുമതലക്കാരനായി താന്‍ കാണില്ലെന്നും അദ്ദേഹം അറിയിച്ചു. തൃശ്ശൂരില്‍ നടക്കാനിരിക്കുന്ന ശാസ്ത്രമേളയിലെ ഭക്ഷണത്തിന്റെ ചുമതലയില്‍ നിന്നും പിന്മാറുന്നതായും അദ്ദേഹം വ്യക്തമാക്കി.
ഭക്ഷണ വിവാദങ്ങള്‍ക്ക് പിന്നാലെ കഴിഞ്ഞ ദിവസം കലോത്സവത്തിന്റെ കൊടിയിറങ്ങിയപ്പോള്‍ അടുത്ത വര്‍ഷം മുതല്‍ നോണ്‍വിഭവങ്ങളും ഉണ്ടാകുമെന്ന് വിദ്യാഭ്യാസ പ്രഖ്യാപനം നടത്തിയിരുന്നു. ഇറച്ചിയും മീനും വിളമ്പാന്‍ കലോത്സവ മാനുവല്‍ പരിഷ്‌കരിക്കുമെന്നും മന്ത്രി പറഞ്ഞിരുന്നു.
